नेपाः न्हापांगु कासाय् विजयी

येँ – थाइल्याण्डय् जुयाच्वगु आइसीसी महिला टि—२० विश्वकपया एसिया क्षेत्रिय छनोटय् नेपालं थःगु न्हापांगु कासा त्याकूगु दु । नेपाल न्हापांगु कासाय् मलेसियायात ३४ रनं बुकूगु खः। बैंककया तेर्थाइ मैदानय् जूगु कासाय् नेपालं न्हापां ब्याटिङ्ग यासें निर्धारित २० ओभरय् ५ विकेटया क्षतिइ १२६ रन दयेकूगु खः ।

१२७ रनया लक्ष्य ज्वनाः मैदानय् वःगु मलेसियां धाःसा निर्धारित २० ओभरय् ७ विकेटया क्षतिइ मुक्कं ९२ रन जक दयेकेफत । मलेसियायात बुकेगु झ्वलय् नेपाःया करुणा भण्डारी व सरिता मगरं निगू—निगू विकेट काःगु खः । अथेहे सिता रानामगर व कविता कुँवरं छगू छगू विकेट काल ।

टस त्याकाः न्हापां ब्याटिङ्ग याःगु नेपाःया निंतिं ओपनर सिता रानामगरं दकलय् अप्वः रन दयेकूगु खः । प्लेयर अफ द म्याच जूम्ह उपकप्तान रानामगरं ४० बलय् निगू चौका सहित ४२ रन दयेकूगु खः । अथेहे कप्तान रुविना चौधरीं २५ बलय् ३ चौका सहित नटआउट ३३ रन दयेकलसा इन्दु वर्मां १४ बलय् १३ रन दयेकल ।

अथेहे भेट्रान कासामि नेरी थापां १३ बलय् ६ रन दयेका रन आउट जुल । काजल श्रेष्ठं ४६ बलया साझेधारी यासें २९ बलय् ३ चौका सहित १६ रन दयेकूगु खः । सरिता मगरं छगू जक बल म्हिताः छगू हे रन दयेकल । ममता चौधरी धाःसा छगू हे रन मकासे रन आउट जूगु खः । मलेसियाया निंतिं जुमिका आजमी, साषा आजमी व विन्फ्रिड दराइसिङ्गमं छगू छगू विकेट काःगु खःसा क्रिष्टिना वारेतं दकलय् अप्व २५ रन दयेकूगु खः।

राउण्ड रोबिन लिगया आधारय् जुयाच्वंगु छनोट कासाय् शीर्ष थासय् लाःगु टिम मेगु चरणय् वनी । थुगु छनोटय् नेपाःलिसें न्हय्गू टिमया सहभागीता दु । नेपाः लिसें थ्व धेंधेबल्लाखय् युएइ, मलेसिया, थाइल्याण्ड, चीन, हङकङ व कुवेत दु । नेपाः लिगया शीर्ष थासय् दु ।