युरोकप २०२० अन्तिम इलय् स्पेन छनोट

स्वक्वःतकया च्याम्पियन स्पेन युरो २०२०या निंतिं छनोट जूगु दु । स्वीडेनलिसे १–१ गोलया बराबरी यासें स्पेनं युरोय् थाय् दयेकूगु खः । छगू गोलं लिउने लानाच्वंगु स्पेनया निंतिं रोड्रिगों इन्जुरी इलय् बराबरी गोल यानाबिउगु खः । छनोटया निंतिं स्पेनयात मुक्कं १ अंक जक आवश्यक जुयाच्वंगु खः ।

तर कासाया ९१ मिनेट तक पराजयय् लँय् हे लानाच्वंगु खः, तर कासाया ९२ औं मिनेटय् रोड्रिगों फाबिएन रुइजया पासय् गोल यासें थ्व पालय् हे छनोट याके बिउगु खः । कासाया ५० औं मिनेटय् मार्कुस बर्गं गोल यासें स्वीडेनयात अग्रता बिउगु खः । थ्वयां लिपा डेभिड डे गियां रोविन क्वीसनया हेडयात उत्कृष्ट बचाउ याःगु खः । .

थ्व कासाय् घाःपाः जूम्ह म्यानचेस्टर युनाइटेडया गोलकिपर गियां प्रिमियरशीपया आइतवाः लिभरपुललिसे जुइगु कासा म्हिते मफयेफुगु खँ धाःगु दु । मेखे आयरल्यान्डं धाःसा युरो छनोटया निंतिं मेगु कासा पिइमालीगु जूगु दु । स्वीटल्यान्डलिसे घरेलु मैदानय् २–० गोलं पराजित जुइवं आयरल्यान्डं मेगु कासा पिइमालीगु जूगु खः ।

समुह डीइ शीर्षस्थानय् लानाच्वंगु आयरल्यान्डया न्हय्गू कासा लिपा १२ अंक दु, आः छनोटया अन्तिम कासा डेनमार्कलिसे म्हिती । थ्व कासाय् त्यात धाःसा आयरल्यान्ड युरो कपय् छनोट जुइसा, पराजित जुल धाःसा मेपिनिगु कासाया लिच्वः पिइमालीगु जुइ । मेखे न्हापा हे छनोट जुइधुंकूगु इटलीं मंगलवाः चान्हय् जूगु कासाय् लेचेस्टाइनयात न्यागू गोल नकूगु दु ।