सेल्फिया ग्वाहालिं हत्यारा ज्वन

फेसबुकय् तःगू छपाः सेल्फिया ग्वाहालिं क्यानेडियन प्रहरीं छम्ह ल्यासेम्ह मिसाया हत्याया अनुसन्धानय् सफलता चूलाकूगु दु । उगु तस्बिरय् हत्याय् छ्यःगु पेटि खनेदयेवं प्रहरीं थप अनुसन्धान सुरु याःगु खः । सन् २०१५ या मार्चय् १८ दँ दुम्ह ब्रिटिनी गार्गोल नांया मिसायात वया पासा २१ दँ दुम्ह चेएने रोजं स्याःगु जुयाच्वन । गार्गोलयात सास्कटुनया ल्याण्डफिल्डय् गःपः तियाः स्यानातःगु अवस्थाय् लुइकूगु खः । वयागु सीम्ह लिसें हत्याय् छ्यःगु छपु पेटी नं प्रहरीं बरामद याःगु जुयाच्वन ।

फेसबुकय् सीम्ह गार्गोल नापं रोजं कयातःगु सेल्फि किपा वःबलय् उगु किपाय् रोजं हत्याय् छ्यःगु धाःगु हे पेटी चिनातःगु खनेदुगु खः । थ्व किपा वयेवं सोमवाः रोजयात हत्याया दोषी ठहर यासें सजाय न्यंकूगु खः । रोजयात आः न्हय्दँया जेल सजाय न्यंकूगु दु । फेसबुकय् उगु सेल्फि वयेधुंकाः प्रहरीं रोजयात शंकास्पदया रुपय् स्वयाः अनुसन्धान न्ह्याकूगु खः । थ्व तस्बिर वयेधुंकाः रोजं थःम्हं गार्गोलयात दायागु व गःपः तियाः स्यानागु स्वीकार याःगु खः । वं उबलय् थःपिं निम्हं लागू वासलं कयाच्वंगु इलय् ल्वापु जूगु व थम्हं दायागु स्वीकार याःगु खः ।