ख्वप नगरपालिकाया नगरसभा क्वचाल

ख्वप (नेपालभाषा टाइम्स) – ख्वप नगरपालिकाया २० क्वःगु नगरसभा वंगु असार २९ गते सोमवाः क्वचाल । वंगु असार ७ गते निसें न्ह्याःगु नगरसभाया लिपांगु बैठक लेखा समितिया प्रतिवेदन पारित यासें क्वचाःगु खः ।

ख्वप नगरपालिकाया प्रमुखलिसें नगरसभाया सभाध्यक्ष सुनिल प्रजापतिया अध्यक्षताय् च्वंगु नगरसभाया लिपांगु बैठकं ख्वप नगरपालिकाया लेखा समितिया प्रतिवेदन, २०८३ सर्वसम्मतं पारित याःगु खः ।

लिसें बैठकं ख्वप नगरपालिकाया आ.व ०८३/८४या खरिद गुरुयोजना, वार्षिक खरिद योजना, ख्वप नगरपालिकापाखें कर व गैर कर राजस्व लगे यायेगु व म्हयेगु सम्बन्धय् व्यवस्था यायेत दयेकूगु ऐन, २०८३, देको मिवा इतापाके जग्गा एकीकरण आयोजनासम्बन्धी छेँ लाइन, साविकया क्षेत्रफल बमोजिक नक्सा पास सम्बन्धी प्रस्ताव, नगरपालिकाया कर्मचारीया म्याद थप, तलब प्रतिवेदन, विकास निर्माण व योजनाया फरफारकसम्बन्धी प्रस्तावत नं पारित याःगु खः ।

सभां ख्वप नगरपालिका, भौतिक पूर्वाधार व निर्माणसम्बन्धी मापदण्ड विनियमया २०६०या परिच्छेद ५ अन्तर्गत दुगु विशेष व्यवस्थाय् न्हूगु बुँदा नं. १४ थप यायेगु प्रस्ताव नं पारित याःगु खः । सभाय् ख्वप नगरपालिका ९वडाअध्यक्ष रवीन्द्र ज्याख्वं ख्वप नगरपालिकाया २० क्वःगु नगरसभाया बःचाःहाकःगु प्रतिवेदन न्ह्यब्वयादीगु खः ।