
एजेन्सी – अष्ट्रियाया राजधानी भियनाय् आतंकवादी आक्रमण जूगु दु । थ्व आक्रमणय् लानाः म्होतिं नं स्वम्हेसियात ज्यान वंगु दुसा झिंप्यम्ह घाःपाः जूगु दु । सीपिं मध्ये छम्ह आक्रमणकारी जूगु खँ धाःगु दु । राइफल ज्वनावःपिं आतंकवादीतय्सं खुगू बिस्कं बिस्कं थासय् गोलीं कयेकूगु खः । सामाजिक सञ्जालय् पोस्ट जुयाच्वंगु भिडियोय् प्रहरी व आक्रमणकारी दथुइ गोली हानाहान जूगु खनेदु ।
थ्व घटनायात अष्ट्रियाया चान्सलर जेबास्टियन कुर्ट्सं छगू घृणित आतंकवादी आक्रमण धकाः धाःगु दु । प्रहरीं आक्रमणकारी मध्ये छम्हेसित स्यानागु, छम्हेसित ज्वनागु व छम्हेसित मालाच्वनागु खँ धाःगु दु । स्थानीय पत्रिकातय् कथं घाःपाः जूम्ह मध्ये छम्ह यहुदीतय् प्रार्थनासथल सिनागगय् सुरक्षाय् खटे जुयाच्वंगु सुरक्षाकर्मीनं लाःगु दु । सरकारं स्थानीयतय्त सार्वजनिक थासय् पिहां मवयेत व सार्वजनिक यातायात नं मछ्यलेत इनाप याःगु दु ।
थ्व घटनायात कयाः युरोपेली नेतातय्सं भत्र्सना याःगु दु । युरोपेली परिषद्या अध्यक्ष चार्ल्स मिशेलं जीवन व मानवीय मान्यताया उल्लंघन याइगु छगू कायरतापूर्ण आक्रमण धकाः धाःगु दु । अथे हे फ्रान्सया राष्ट्रपति इमानुएल मांक्रों अष्ट्रियाया जनताया पीडालिसे जिमिगु साथ दु धयादीगु दु ।
LEAVE YOUR COMMENTS