अमेरिकाय् सोमवाः कोरोनाया खोपया न्हापांगु परीक्षण जुइगु
एजेन्सी÷ विश्वन्यंकं महामारी कथं न्यनाच्वंगु कोरोना भाइरसया संक्रमणपाखें बचे यायेगु निंतिं विकास याःगु खोपया मनूतय्त न्हापांगु परीक्षण जुइत्यंगु दु । अमेरिकाय् थ्व परीक्षण सुरु जुइत्यंगु खः । अमेरिकी सरकारं बिउगु खर्चपाखें न्हापांखुसी ४५ म्ह वयस्क अमेरिकी स्वयंसेवकत थ्व परीक्षणय् सहभागी जुइत्यंगु खः । खोप परीक्षण अमेरिकाया सियाटलय् वइगु सोमवाः जुइ ।
थ्व स्वयंसेवकतय्सं संक्रमित मजूसां खोपया थीथी मात्रा काइ । थ्व खोपय् वास्तविक कोरोनाभाइरसया छुं अंश दइमखु । थुकी मेसिन्जर आरएनएया छुं ब्व जक दइगु खँ धाःगु दु ।
विरामीया कोषयात भाइरसया संक्रमणपाखें बचे यायेगु वा ल्वय् विरुद्ध ल्वानाः लंकेत आवश्यक प्रोटीन उत्पादन यायेत सक्रिय याकेगु वैज्ञानिकतय् योजना दु । न्हापांगु चरणया परीक्षणय् कोरोनाभाइरस विरुद्धया भ्यासिनया मात्रां प्रतिरक्षा प्रणालीयात छुं प्रतिक्रिया क्यं कि मक्यंया जाँच जुइ । परीक्षण यायेत्यंगु खोपया नां एमआरएनए–१२७३ तःगु दु । थ्व परीक्षण सियाटलया काइसर पर्मानन्ट वाशिंगटन हेल्ट रिसर्च इन्ष्टिच्युतय् जुइत्यंगु खः ।
LEAVE YOUR COMMENTS