ने. सं. ११४६ दिल्लाथ्व दुतिया - जगन्नाथ रथयात्रा

निल शाक्ययात ‘संगीत साधक सम्मान’

यल (नेपालभाषा टाइम्स) – नेपालभाषाया नांजाःम्ह लय्चिनामि निल शाक्ययात ‘संगीत साधक सम्मान–११४६’ पाखें सम्मान याःगु दु । प्रतिभा सेवा समाजया ग्वसालय् ‘एन इभिनिङ विट लेजेन्डरी म्यूजिसियन निल शाक्य’या नामं जूगु सांगीतिक ज्याझ्वलय् संगीतकःमि शाक्ययात छगू लख तका दांलिसें उगु सम्मान लःल्हाःगु खः ।

ज्याझ्वलय् संगीतकःमि शाक्ययात समाजया नायः सुरेन्द्र तुलाधरं स्वांमाः क्वखायेकादीगु खःसा न्वकु गोपालकृष्ण महर्जनं तपुलिं पुइकादीगु खः । समाजया छ्याञ्जे रुमन जोशीं खादा क्वखायेकादीगु ज्याझ्वलय् मूपाहां येँ महानगरपालिका १९ वडाअध्यक्ष राजेशकुमार श्रेष्ठं हनापौलिसें छगू लख तका दांया चेक बोर्ड लःल्हानादीगु खः । समाजया दांभरिं सुधा शाक्यं छगू लखया चेक लःल्हानादीगु ज्याझ्वलय् विशेष पाहांकथं झायादीपिं यल महानगरपालिका १६ वडाअध्ष्क्ष निर्मलरत्न शाक्यं दोसल्ला व ११ वडाअध्ष्क्ष अरोजकुमार खड्गी व येँ महानगरपालिका २० वडाअध्यक्ष राजेन्द्र मानन्धरं खादा क्वखायेकाः हनेज्या यानादीगु खः ।

लय्चिनामि, म्येँ हालामिलिसें छाँयाकार अमर चित्रकारया ए.एम क्रियसनं तयार याःगु निल शाक्यया बायोग्राफी न्ह्यब्वसें न्ह्याःगु ज्याझ्वलय् लय्चिनामि शाक्यया लोकंह्वाःगु थीथी झिंस्वपु म्येँ नं न्ह्यब्वःगु खः । ज्याझ्वलय् शाक्यं च्वयादीगु व लसय् हनादीगु लोकंह्वाःगु म्येँ ‘स्वयेगु मन जुल रे’, ‘नकतिनि नाप लाःम्ह’, ‘थ्व फसय्’, ‘सुलिं मय्जु’, ‘अय्लाः अय्लाः’, ‘बागलाया स्वां’, ‘जिगु लसता छ हे’, ‘यौवन जिगु जाया वःथें’, ‘माया जालं क्यंकाः’, ‘माया रत्न’, ‘सःरी धयाब्यु’ म्येँ न्ह्यब्वःगु दु । ज्याझ्वलय् न्ह्यब्वःगु थुपिं म्येँ सरिता शाही, कविता जोशी श्रेष्ठ, एञ्जिला श्रेष्ठ, सतिश महर्जन, रोविन्सन कंसाकार, शुद्धलक्ष्मी श्रेष्ठ, मोहन शाक्य, रोजी डंगोल श्रेष्ठ, देवीका वन्दना, राजेश महर्जन व सुरेन्द्र तुलाधरं म्येँ न्यंकादीगु खः ।

करिब ३५दँ न्ह्यः ‘स्वयेगु मन जुल रे’ म्येँ च्वयाः नेपालभाषा सांगीतिक ख्यलय् पलाः न्ह्याकादीम्ह लय्चिनामि शाक्यं दकलय् न्हापां हालादीगु म्येँ ‘गल्लि दुने चिधंगु गल्लि’ खःसा पवित्र कसां हालादीगु म्येँ ‘तिकिझ्याः प्वालं जः ज्वया वःथें’ म्येँय् लसय् हनादीगु खः । ७५ पु म्येँ लसय् हनेगु, १५ पु म्येँय् सः बियादीगु व ४० पुं मल्याक म्येँ च्वयादीधुंकूम्ह शाक्यया याकः सः व लसय् नेपालभाषाया ‘जिलिसे छझाः’ व खस नेपाली भाय्या ‘तिम्रो हेराई’ व ‘ओझेल’ नांया म्येँचाः पिदंगु दु ।

सांगीतिक बाहेकं अभिनय ख्यलय् नं पलाः न्ह्याकादीम्ह वय्कलं दकलय् न्हापां ‘लसकं पिब्वःगु’, नाटकय् अभिनय यानादीगु खःसा ‘ससःया पसः’ ख्यालःलिसें लोकंह्वाःगु टेलिप्याखं ‘ख्वताबजि’, ऐतिहासिक नाटक ‘विरह राग’, ‘कपिलवस्तुस भगवान’, संकिपपाखे ‘पानवति’, ‘पटाचारा’, ‘लय्’, ‘धौबजि’, ‘हिसिमदु’इ नं अभिनय यानादीगु दु । वय्कः ‘आदिवासी जनजाति मातृभाषा राष्ट्रिय चलचित्र पुरस्कार २०८२’, ‘न्यू ट्यालेन्ट उत्कृष्ट च्वमि’ २५ दँ तक मदिक्क् संगीत ख्यलय् बियादीगु योगदान स्वरुप ‘लाय्कू राजभाई सिरपाः’, ‘नेपालभाषा स्टार म्युजिक आवार्ड’पाखें नं सम्मानित जुयादीधुंकूगु दु ।