अस्थायी, करार कर्मचारीत आन्दोलित
येँ (नेपालभाषा टाइम्स) – अस्थायी, करार व दैनिक ज्यालादारी कर्मचारीत आन्दोलनय् कुहां वःगु दु । म्हिगः सिंहदरबार न्ह्यःने ज्यालादारी कर्मचारीतय्सं नारा थ्वयेकाः आन्दोलन याःगु खः । थ्व स्वयां न्ह्यः वंगु मंगलवाः अर्थ मन्त्रालय धर्ना बिउगु खः । स्वंगुलिं तहया सरकार मातहत दुपिं थ्यंमथ्यं ५० हजार स्वयां अप्वः कर्मचारी बेरोजगार जुइगु अवस्था वयेत्यंगु धासें करार कर्मचारीत आन्दोलनय् कुहां वःगु खः ।
अस्थायी, करार व ज्यालादारी कर्मचारीतय्त साउन १ गते निसें बिदा बीगु बारे प्रधानमन्त्री तथा मन्त्रिपरिषदय् सहलह जूगु चर्चा जुइवं कर्मचारीत आन्दोलित जूगु खः । सरकारं प्रशासनिक खर्च कटौती व मितव्ययिता नालेगु धासें वइगु आर्थिक दँनिसें अस्थायी व करारया कर्मचारीया पलेसा ठेक्का प्रक्रियां जनशक्ति आपूर्ति यायेगु नीति नालेत्यंगु खः । उगु नीतिया कारणं झिदँ निसें नीन्यादँ न्ह्यवनिसें निरन्तर सेवाय् दुपिं कर्मचारी विस्थापित जुइगु जोखिम अप्वयाः वनेवं कर्मचारीत आन्दोलित जूगु खः ।
आन्दोलनय् कुहां वःपिं कर्मचारी–तय्सं छक्वःया निंतिं प्रक्रिया पूवंकाः थःपिंत स्थायी यायेमाःगु, सर्वोच्च अदालतं कर्मचारीया पक्षय् याःगु फैसला कार्यान्वयन यायेमाःगु व सामाजिक सुरक्षा कोषया व्यवस्था यायेमाःगु माग याःगु दु ।
आन्दोलनय् दुथ्याःपिं कर्मचारीतय् कथं सर्वोच्च अदालतं २०७० साल भदौ २ गते अस्थायी व करार कर्मचारीतय्त महँगी भत्ता, उपदान व सामाजिक सुरक्षा कोष लगायत सुविधा बीत आदेश बिउगु खः । तर उगु फैसला कार्यान्वयन यायेगु पलेसा सरकारं थःपिंत प्वंगु ल्हातं छेँय् छ्वयेत स्वःगु धासें करार कर्मचारीत आन्दोलनय् कुहां वःगु खः ।
कर्मचारीतय्सं प्रधानमन्त्री कार्यालय, अर्थ मन्त्रालय व संघीय मामिला तथा सामान्य प्रशासन मन्त्रालयं थःपिंत आश्वासन बीगु बाहेक मेगु छुं मयाःगु खँ धाःगु दु ।
LEAVE YOUR COMMENTS