मगन इन्टरटेनमेन्टया ‘तंचाये मते न्हां’

किपू (नेपालभाषा टाइम्स) – नेपालभाषाया म्युजिक भिडियो निर्माण यायेगु झ्वलय् लिपांगु इलय् मेगु छपु म्येँया म्युजिक भिडियो पिदंगु दु । मगन इन्टरटेनमेन्टया ब्यानरय् निर्माण जूगु नेपालभाषाया न्हूगु म्येँ ‘तंचाये मते न्हां’या म्युजिक भिडियो पिदंगु दु ।

बोसिगां पुचःया ग्वसालय् वंगु शनिवाः थनया कीर्तिपुर सिनेप्लेक्सय् जूगु छगू ज्याझ्वःया दथुइ मूपाहां चन्द्रागिरि नगरपालिकाया प्रमुख घनश्याम गिरीं म्युजिक भिडियोया पितब्वज्या यानादीगु खः ।

ज्याझ्वलय् नवासें मूपाहां नगर प्रमुख गिरीं चन्द्रागिरि नगरपालिका नं स्वनिगःया मेमेगु नगर थें कला, संस्कृति व संस्कारया तःमिगु नगर खः धासें पितब्वज्या जूगु म्युजिक भिडियोया छाँयाकनय् नेवाः तजिलजि, कला, संस्कार, संस्कृति दुथ्याकेया निंतिं नगरपालिकापाखें नं फूचाःगु ग्वाहालि याये खंगुलिं लसता प्वंकादिल ।

छाँयाकन, निर्देशन व सम्पादन रजिन महर्जनं यानादीगु म्युजिक भिडियोय् मनोज महर्जन, सृष्टि महर्जनया मू भूमिकालिसें मेपिं आपालं कलाकारं नं अभिनय यानादीगु दु ।

म्येँ च्वमिलिसें लय्चिनामि रकि महर्जनं लसकुस यासें न्ह्याःगु ज्याझ्वलय् चन्द्रागिरि नगरपालिका १० वडाअध्यक्ष शिवकुमार महर्जन, मनोज महर्जन, राज साय्मि, नितेश तण्डुकार लगायतं नुगःखँ तयादीगु खः ।

ज्याझ्वः रामकृष्ण महर्जनया सभापतित्वय् जूगु खःसा म्युजिक भिडियोया कलाकार व प्राविधिकपिंत मतिनाया चिं नं लःल्हाःगु खः ।