ने. सं. ११४६ दिल्लाथ्व दुतिया - जगन्नाथ रथयात्रा

किपूया बाघभैरवया मूर्तियात तःजिक लसकुस

किपू (नेपालभाषा टाइम्स) -किपूमितय् आराध्य देव बाघभैरव (धुम्बाः आजु)या जात्राय् विशेष ब्वज्या यायेत तयार याःगु हाथ्वँ द्यःया मूर्तियात तःजिक लसकुस याःगु दु । गुँदे दाफा खलःया विशेष अग्रसरता व कुतलय् हाथ्वँ द्यःयात छुं दिं न्ह्यः विशेष सम्ममानपूर्वक किपुलिइ हयाः लसकुस याःगु खः ।

खलःया सक्रियताय् हाथ्वँ द्यःया मूर्ति दयेकेगु ज्या क्वचायेवं विशेष पुजा यासें हाथ्वँ द्यःया मूर्ति किपुलिइ तःजिक लसकुस यासें हःगु खःसा उगु इलय् खलःया नायः अशोक महर्जनं मूृर्ति दयेकेगु ज्याय् योगदान यानादीपिं कालिगढतय्त नं विशेष हनेज्या यानादीगु खः ।
धिमे, खिं, बासुरिलिसें थीथी परम्पागत व सांस्कृतिक बाजंसहितं ख्वपया मध्यपुर थिमि, यलया हात्तिवन जुयाः किपू देशय् नगर प्रवेश याकूगु खः । उगु इलय् आपालं मात्राय् किपूमि भक्तजनतय् उपस्थिति दुगु खः ।

मध्यपुर थिमिया मूर्तिकार गणेशकुमार प्रजापतिं दयेकादीगु हाथ्वँ द्यःया उगु मूर्ति किपुलिइ तक हयेगु निंतिं धौख्यःया मूर्तिकार दिनानाथ घोलीं विशेष व महत्वपूर्ण योगदान यानादीगु खः । थनिं १२ दँ न्ह्यः २०७० सालय् बाघभैरवया मूर्ति जिर्णोद्वार यायेगु झ्वलय् लुया वःगु सिजःपौया अभिलेखया लिधंसाय् हाथ्वँ द्यःया मूर्ति दयेकेगु ज्या न्ह्याःगु खः । करिब निदँ तकया अथक कुतःलिपा अन्तत कलात्मक रुपया १० फिट तःधिकःम्ह हाथ्वँ द्यःया मूर्ति किपू नगरय् दुत हयेत ताःलाःगु खलःया नायः महर्जनं कनादिल ।

दँय्दसं भदौ १ गते तःजिक जात्रा यायेगु याना वयाच्वंगु किपूया आराध्यदेव बाघभैरवया जात्राय् स्वर्ण शक्तिभैरवया मूर्ति ब्वयेगु नापं समयबजि व हाथ्वँ हायेकाः प्रसाद इनेगु चलन दुगु नं वय्कलं कनादिल । हाथ्वँ द्यः निर्माणं पूर्णता कायेधुंकाः आः दँय्दसं भदौ १ गते जुइगु बाघभैरवया जात्राय् स्वर्ण शक्तिभैरवया मूर्ति ब्वयेगु, समयबजि इनेगु व हाथ्वँ हायेकाः प्रसाद इनेगु ज्यां पूर्णता काइगु नं अध्यक्ष महर्जनं कनादिल ।