काश्मिरय् प्रदर्शन जूगु दावी
भारतीय सरकारं भारत प्रशासित काश्मिर राज्यया विशेषाधिकार खारेज यानाः केन्द्र प्रशासित यायेवं वंगु शुक्रवाः राजधानी श्रीनगरय् प्रदर्शन जूगु दु । श्रीनगरय् प्रदर्शन जूगु खबर अलजजिरा, न्यूयोर्क टाइम्स, वाशिंगटन पोस्ट थेंज्याःगु समाचार संस्थातय्सं प्रकाशन याःगु खः ।
भारतं काश्मिरय् केन्द्रीय शासन लागू यायेवं अनया संचार माध्यमयात हे बन्द यानातःगु दु ।
अथे जूगुलिं काश्मिरय् छु जुयाच्वन धयागु खँ बांलाक पिहां वयाच्वंगु मदुनि । सरकारं काश्मिरया टेलिफोन, इन्टरनेट फुक्कं बन्द यानातःगु दु । अलजजिरा, न्यूयोर्क टाइमस, वाशिंगटन पोस्टय् पिहां वःगु समाचार कथं प्रदर्शनकारीतय्त नियन्त्रणय् कायेगु निंतिं सुरक्षाकर्मीतय्सं अश्रु ग्यास कयेकूगु दुसा हवाइ फायर नं याःगु दु ।
प्रदर्शनकारी व सुरक्षाकर्मी दथुइ जूगु झडपय् लानाः तःम्ह हे प्रदर्शनकारी घाःपाः नं जूगु दु ।विदेशी पत्रिकाय् काश्मिरय् प्रदर्शन सुरु जूगु समाचार पिदनाच्वंबलय् भारतीय मिडियाय् धाःसा काश्मिरया स्थिति सामान्य जूगु दावी यानाच्वंगु दु । भारतीय मिडियातय्सं धाःसा काश्मिरया स्थिति शान्तिपूर्ण दुगु खँ धयाच्वंगु दु ।
विदेशी पत्रिकातय्सं काश्मिरय् विदेशी पत्रकार व संचार सुविधायात प्रतिबन्ध तयातःगु खँ धाःगु दु । कतारं प्रशारण जुइगु अल जजिरां थःपिंके शुक्रवाः जूगु विरोध प्रदर्शनया भिडियो फुटेज दुगु खँ धाःगु दु । अल जजिरया कथं श्रीनगरय् शुक्रवाः नमाज ब्वने क्वचायेवं प्रदर्शन सुरु जूगु खः । थुकी हजारौं प्रदर्शनकारीतय्सं कफ्यू आदेशयात त्वाःल्हासें श्रीनगर मू नगरपाखे न्ह्याःवंगु खः ।
प्रदर्शनकारीतय्सं हाकुगु ध्वाँय् ब्वयेकाः ‘वी वान्ट फ्रिडम’, ‘अनुच्छेद ३७० खारेज याःगु स्वीकार मदु’ धयागु ब्यानार ज्वनावःगु खः ।
भारतया केन्द्रीय सरकारं वंगु सोमवाः जम्म काश्मिरयात विशेष दर्जा बीगु संविधानया अनुच्छेद ३७० खारेज यासें थ्व राज्ययात हे निगू ब्वय् ब्वथलाः केन्द्रीय शासन लागू याःगु खः ।
काश्मिरय् केन्द्रीय शासन लागू यायेगु भारतीय सरकारया निर्णय विरुद्ध पाकिस्तानया कराची शहरय् नं शुक्रवाः प्रदशृन जूगु खः । उगु प्रदर्शनय् भारतीय प्रधानमन्त्री नरेन्द्र मोदीयात आतंकवादी धासें मोदीया पुतला नं च्याकूगु खः ।
LEAVE YOUR COMMENTS