ने. सं. ११४३ तछलाथ्व द्वादशी -

चुरोटया बट्टाय् थःगु तुति खनेवं ….

चुरोट, सूर्ती, पान पराग सेवनं स्वास्थ्यया निंतिं मनिं धकाः सकसिनं सिउ । अथे खःसां उकिया उपभोग याइपिनिगु ल्याः म्हो मजू । उकिं झीथाय् जक मखु विदेशय् तकं अज्याःगु पदार्थया सेवन जुइगु खतराया संकेत बीकथं चेतावनीमूलक किपा तयेगु चलन दु ।

तर अज्याःगु पदार्थ सेवनं जुइगु खतराया संकेतया थासय् सुं छम्ह मनूया चानातःगु तुतिया किपा तयाबिल धाःसा उकिं छु संकेत बी ? संकेत छु बी धइगु खँ छखे तये अज्याःगु हे किपाया कारणं पूर्वी फ्रान्सय् तःधंगु समस्या पिहां वःगु दु । अल्बानियाली मूलया ६० दँ दुम्ह मनू, गुम्हेसिया छपा तुति मदु, वयागु किपा चुरोटया बट्टाय् तया बिउगुलिं तःधंगु हे समस्या खने दयाच्वंगु दु ।

चुरोट सेवनं जुइफुगु सम्भावित खतराया संकेत वा ख्याच्वः बीकथं उगु किपा तयातःगु खः। लिसें किपाया क्वसं ‘धुम्रपानया सेवनं छिगु धमनी अवरुद्ध यानाबी’ धकाः च्वयातःगु दु । सन् १९९७य् अल्बानियाय् जूगु छगू घटनाय् गोलीं कयाः थःगु तुति मदयेका च्वनेमाःम्ह उम्ह मनखुं थःगु चानातःगु तुतिया किपा प्रयोग जूगुयात विश्वासघात याःगु द्वपं बिउगु दु ।

थःगु चानातःगु तुतिइ छुं उपकरण जडान याये फइला धकाः छगू स्थानीय अस्पतालय् न्यनेकने यायेत वंगु इलय् उगु किपा काःगु जुयाच्वन । थःगु किपा उकथं प्रयोग जूगु घटनायात कयाः थःत विश्वासघात याःगु टिप्पणी उम्ह मनुखं याःगु दुसा अस्पतालयात नं थ्व सम्बन्धय् थःत जानकारी बीत माग याःगु दु ।

थुकिं यानाः अस्पतालयात छगूकथंया समस्याय् लाका बिउगु खःसा अस्पतालं युरोपेली आयोगय् सम्पर्क तयेत धासें थः बचे जुइगु कुतः याःगु दु । थुकियात कयाः यक्वसिनं असन्तुष्टि प्वंका हयाच्वंगु दु ।