सिरियाली राष्ट्रपतिं उत्तर कोरिया भ्रमण याइगु

सिरियाली राष्ट्रपति बशर अल असदं उत्तर कोरियाया राजकीय भ्रमण याइगु जूगु दु । उत्तर कोरियाली सरकारी समाचार संस्थां असद याकनं हे उत्तर कोरिया वइगु समाचार च्वःगु खः । यदि असद उत्तर कोरिया थ्यन धाःसा सन् २०११ लिपा सुं नं राष्ट्र प्रमुखं उत्तर कोरियाया भ्रमण याःगु थ्व हे न्हापांखुसी जुइ ।

थौंकन्हय् उत्तर कोरियाया नेता किम जङ अनं अन्तर्राष्ट्रिय ख्यलय् कुटनीतिक गतिविधि अप्वयेका यंकाच्वंगु दु । थ्वहे झ्वलय् सिरियाया राष्ट्रपति नापलायेत्यंगु खः । किमं छुं ई न्ह्यव तिनि चीन वनाः राष्ट्रपति सी जिनपिंगयात नापलाःगु खः । आः वइगु जूनय् अमेरिकी राष्ट्रपति डोनाल्ड ट्रम्पयात नापलायेगु तयारी यानाच्वंगु दु ।

असदं भ्रमणय् वयेत्यंगु समाचार वःसां उत्तर कोरियां धाःसा थुकिया बारे छुं प्रतिक्रिया बिउगु मदुनि । अन्तर्राष्ट्रिय समुदायं थुपिं निगुलिं देय्यात रासायनिक हतियारया निंतिं सहकार्य याःगु द्वपं बिइगु यानाच्वंसां निगुलिं देशं धाःसा थुकियात अस्वीकार याना वयाच्वंगु दु ।समाचार संस्था केसीएनं असदया भ्रमण तिथि बारे छुं न्हयथंगु मदु ।

समाचारय् असदं थः उत्तर कोरियाया भ्रमणय् वनेत्यनागु व किम जङ अनयात नापलायेत्यनागु धकाः धाःगु जक न्हयथनातःगु दु । सिरियाया निंतिं उत्तर कोरियाली राजदूतं ओहदाया प्रमाणपत्र लःल्हाःगु इलय् असदं थ्व खँ धाःगु खः । थ्व झ्वलय् असदं किमं अन्तिम जित चूलाकीगु व कोरियाया पुनः एकीकरणया महसुस याकीगु खँय् थः विश्वस्त दुगु खँ नं धाःगु खः ।

उत्तर कोरियां सन् १९६६ इ सिरियालिसे कुटनीतिक स्वापू कायम याःगु खःसा सन् १९७३ य् अरब इजराइल ल्वापुया इलय् सेना नं छ्वःगु खः । वंगु फेब्रुअरीइ पितबिउगु संयुक्त राष्ट्र संघया छगू प्रतिवेदनय् सन् २०१२ निसें २०१७ तकया दुने उत्तर कोरियां रासायनिक हतियार दयेकेत ४० खेप सामग्री सिरिया छ्वःगु खँ न्ह्यथनातःगु खः ।