‘इरानी नेता नापलायेगु इच्छा दु’
अमेरिकी राष्ट्रपति डोनाल्ड ट्रम्पं वइगु वालय् संयुक्त राष्ट्र संघया महासभाया झ्वलय् इरानी राष्ट्रपतियात नापलायेगु सम्भावना दुगुख ँ धयादीगु दु । तर थुकिया निंतिं औपचारिक रुपं छुं कार्यक्रम क्वःमजिउनिगु खँ नं वय्कलं धयादीगु दु । संयुक्त राष्ट्र संघया महासभा बैठकस्थल न्यूयोर्कय् निम्ह नेता नापलायेफुगु सम्भावनायात कयाः थौंकन्हय् थीथी अनुमान जुयाच्वंगु दु ।
फ्रान्सेली राष्ट्रपति इम्मानुएल म्यांक्रों धाःसा निम्हं नेतातय्त नापलाकेगु निंतिं कुतः धाःसा यानाच्वनादीगु दु । सउदी अरेबियाया निगू चिकं प्रशोधन केन्द्रय् आक्रमण जुइधुंकाः इरान व अमेरिका दथुइ तनाव ब्वलनाच्वंगु दु । अमेरिकां सउदीइ इरानं हे आक्रमण याःगु द्वपं बियाच्वंगु दुसा इरानं थ्व द्वपंयात अस्वीकारयाना वयाच्वंगु दु ।
थ्वहे दथुइ राष्ट्रपति ट्रम्पं पत्रकारत खँ ल्हासें थः इरानी नेतायात नापलाये चाहे जुयाच्वनागु खँ धयादीगु दु । ‘तर आःतक नापलायेगु कार्यक्रम बारे छुं सहलह जूगु मदुनि’ वय्कलं धयादीगु दु । सोमवाः फ्रान्सेली राष्ट्रपति म्यांक्रों राष्ट्रपति ट्रम्पलिसे अनौपचारिक सहलह यायेधुंकाः उकुन्हु सनिलय् इरानी नेतालिसें थ्यंमथ्यं ९० मिनेट वार्ता यानादीगु खः ।
फ्रान्सेली राष्ट्रपतिया ज्याकुथिं पितबिउगु विज्ञप्तिइ निगुलिं देय् दथुइया गतिरोध अन्त्य याये अःपु मजू, तर इरानं थःत छुं सुधार यायेमाःगु खँ धयातःगु खः । राष्ट्रपति म्याक्रों धयादीगु दु, ‘जिं फक्व कुतः याये, ताकि सहलहया बांलाःगु वातावरण दयेमाः ।’अमेरिकी राष्ट्रपति ट्रम्पं इरानलिसे वार्ता यायेत फ्रान्सया मध्यस्थता आवश्यक मदुगु खँ धयादीगु दु । वय्कलं इरानी नेतातय्सं थःपिंत नापलायेगु निंतिं स्वापू तयेगु विन्दू बांलाक हे सिउगु खँ नं वय्कलं धयादीगु दु ।
LEAVE YOUR COMMENTS