न्यातँपौ देगःया ३२४ क्वःगु बुसादँ न्यायेकल

ख्वप (नेपालभाषा टाइम्स) – जुजु भूपतीन्द्र मल्लया पालय् खुलां निर्माण सम्पन्न याना रेकर्ड कायम याःगु धयातःगु ख्वपया न्यातँपौ देगःया बुसादँ बुधवाः दिलाथ्व पारु कुन्हु तःजिक न्यायेकल । न्यातँपौ देगः दुने दुम्ह सिद्धिलक्ष्मी भगवतीयात दुगु व हँय् बली बियाः न्यातँपौया पलिइ थहां वनाः सुचुकुच यासें गजुलिइ पःताः ब्वयेकाः बुसादँ न्यायेकूगु खः ।

न्यातपौ देगलय् थहां वनाः घाँय् पुइगु व सुचुकुचु यायेगु ज्या स्थानीय तुंथिमलाया अवाल प्रजापतितय्सं जक यायेगु व्यवस्था यानातःगु दु । न्यातँपौ देगः दयेकूगु इलय् यक्वः हे ग्वाहालि याःगुलिं उमित जक अन थहां वनेगु अनुमति बियातःगु खः । थुगु देगः दने धुंकाः ल्यं दुगु माअप्पां तुंथिमलाया अवाःतय् टेराकोटा भवन दंगु जनविश्वास यानातःगु दु ।

प्रा डा. सिद्धिबीर कर्माचार्यं देगः दुने च्वंम्ह सिद्धिलक्ष्मीयात गुह्य पूजा याये धुंकाः राजोपाध्याय ब्रम्हू व जोशी बःजुपिंसं पूजा यायेवं देगलय् थहां वनाः नीन्याम्ह अवाल ल्याय्म्हतय्सं सुचुकुच यानाः ध्वाँय् ब्वयेकेगु ज्या याःगु खः । सछिधानि दुगु गजुलिइ ध्वाँय् धस्वाकूगु खः ।

९९ मिटर ३३३ फिट तःजाःगु देगलय् थहां वनाः सुचुकुचु याइपिनि सुरक्षाया निंतिं व बीमाया निंतिं आःतक छुं व्यवस्था मजूनिगु खँय् धाःसा स्थानीयतय्सं चिन्ता प्वंकूगु दु ।

गुथि संस्थानं बिइगु छुं दामं आः तकं पूजा व सुचुकुच यायेगु व समय्बजी इनेगु ज्या जक जुयाच्वंगु दु । संस्थां बीगु ध्यबा स्यंल्ह्वं यायेत, सुचुकुच यायेत व ध्वाँय् धस्वाकेत तकं मगाःगु गुथियारपिनि गुनासो दु ।