होर्मुजय् भंसार शुल्क कायेगु प्रस्ताव लित काल
वाशिंगटन – अमेरिकी राष्ट्रपति डोनाल्ड ट्रम्पं ‘स्ट्रेट अफ होर्मुज’ जुयाः वये वने याइगु जहाजयाके कायेगु धाःगु २० प्रतिशत भंसार शुल्कया प्रस्ताव लित काःगु दु । राष्ट्रपति ट्रम्पं वंगु सोमवाः जक होर्मुज जुयाः वये वने याइगु जहाजय् अमेरिकां २० प्रतिशत भंसार शुल्क कायेगु घोषणा याःगु खः । इरानी बन्दरगाहय् नाकाबन्दीया घोषणा यासें होर्मुजय् अमेरिकां शुल्क कायेगु घोषणा ट्रम्पं याःगु खः ।
थःगु पूर्व घोषित प्रस्ताव लित कासें राष्ट्रपति ट्रम्पं आः उकिया पलेसा खाडी राष्ट्रतलिसे तःधंगु व्यापार व लगानीया सम्झौता यायेगु धाःगु दु ।लिसें थुकिं अमेरिकां अझ अप्वः लबः काये फइगु नं ट्रम्पं धाःगु दु । खाडी राष्ट्रतलिसे याइगु थुगु सम्झौतां अमेरिकाय् तःधंगु ल्याखय् लगानी दुहां वइगु व उकिं लखौया न्हूगु रोजगारीया अवसर नं ब्वलनीगु ट्रम्पं धाःगु दु ।
थःगु सामाजिक सजाल ट्रुथ सोसलय् ट्रम्पं मध्यपूर्वया नेतातलिसे जूगु ‘तसकं सकारात्मक वार्ता’ लिपा होर्मुजय् २० प्रतिशत शुल्क कायेगु निर्णय हिलागु दु धकाः च्वःगु दु । लिसें उकिया पलेसा आः खाडी राष्ट्रलिसे व्यापार व लगानी सम्म्झौताय् केन्द्रीत जुइगु नं ट्रम्पं न्ह्यथंगु दु ।
ट्रम्पं सोमवाः जक रणनीतिक रुपं महत्वपूर्ण समुद्री मार्गया सुरक्षा अमेरिकां यानाच्वनागु धों उकिया लागत मेमेगु देशं फयेमाः धाःगु खः । ट्रम्पं होर्मुजया संरक्षक जुइगु व उगु लँपु जुयाः वये वने याइगु सकतांकथंया कार्गो जहाजय् २० प्रतिशत शुल्क म्हयेगु घोषणा याःगु खः ।
सेना छ्वयेगु बारे लिसः बीत अस्वीकार
थ्व हे झ्वलय् राष्ट्रपति ट्रम्पंं इरानया खार्क टापुइ अमेरिकी सेना छ्वयेगु बारे लिसः बीत अस्वीकार याःगु दु । ट्रम्पं इरानया खार्क टापु कब्जा यायेत अमेरिकी सेना छ्वयेगु योजना बारे तप्यंक लिसः बीत अस्वीकार याःगु संचारमाध्यमतय्सं न्ह्यथंगु दु ।
‘फक्स न्युज’यात बिउगु छगू अन्तर्वार्ता ट्रम्पं थ्व सम्बन्धय् लिसः बीत अस्वीकार याःगु खः । खार्क टापु कब्जा योगु योजना अझं दनि कि मंत धकाः न्यंगु न्ह्यसःया लिसलय् ट्रम्पं जिं छितः थ्व बारे धाये मिले मजू, छाय्कि जिं थ्व बारे धाल धाःसा व जिगु मूर्खता जुइ’ धकाः लिसः बिउगु खः ।
LEAVE YOUR COMMENTS