मूर्तिकला ख्यलय् थिनाच्वंम्ह चितवनया मूर्तिकार
येँ (रासस) – चितवनया भरतपुर महानगरपालिका २१ पार्वतीपुरस्थित ‘डिभाइन आर्ट स्टुडियो’या संचालिका मय्जु इन्दिरा श्रेष्ठया मूर्ति कलाकारिता थ्व इलय् मेपिनिगु निंतिं नं प्रेरक जुयाच्वंगु दु । मचांनिसें हे थःगु मूर्तिकारिताप्रतिया अभिरुचियात व्यावहारिक जीवनय् सशक्त रुपं छ्यला वयाच्वनादीम्ह वय्कलं थ्व दथुइ आपालं ल्याखय् मूर्ति निर्माण यानादीधुंकूगु दु । देय्या थीथी थासय् वय्कलं तयार यानादीगु मूर्ति थ्यनेधुंकूगु दुसा थाय्थासय् जुइगु थीथी मूर्तिकला कार्यशालाय् नं वय्कःया माग उतिकं अप्वया वनाच्वंगु दु ।
हालय् जक खोटाङया दिक्तेल रुपाकोट मझुवागढी नगरपालिकाय् जूगु ‘मझुवागढी मूर्ति कार्यशाला’ य् वनाः वय्कलं साप्सु खुसिया ल्वहंतय् स्वये हे यइपुसे च्वंगु प्रकृतिपरक ‘चरी अमिली’या हः निर्माण सम्पन्न यानादीधुंकूगु दु । वय्कलं तयार यानादीगु व थीथी थासय् छाय्पियाःतःगु मूर्तिं नं वय्कःया मूतिप्रतिया कलाकारितायात अझ अप्वः च्वन्ह्याकेगु व चर्चाय् हयाच्वंगु दु ।
चितवनया भरतपुर विमानस्थल न्ह्यःने च्वंगु धुँया मूर्ति वय्कलं हे दयेकादीगु खः । अथे हे कोहलपुरया प्यकालँय् तयातःगु धुँ, किसि आदिया मूर्ति चितवन भरतपुर महानगरपालिका २२ वडा ज्याकू न्ह्यःने कमलपुखूया दथुइ च्वंगु पलेस्वां, भरतपुर २३ घैलाघारीइ तयातःगु घःसहितया मिसाया मूर्तिया कारणं वय्कःया मूर्तिकलाया कलाकारितां चर्चा कया वयाच्वंगु दु ।
गोरखाया मनकामना न्ह्यःने तयातःगु ल्हातं सन्त्रासि फयाच्वंगु मूतिनिसें रामपुर विश्वविद्यालय न्ह्यःने तयातःगु नौ फिटया कःमि, मेघौलीइ च्वंगु घः कुबियाच्वंम्ह थरुनी मिसाया मूर्ति, नेपालगन्जया चिल्ड्रेन पार्कय् तयातःगु मा गैंडा, मचा, किसि, धुँ आदिया मूर्तित नं वय्कलं हे दयेकादीगु खः । थः दाजु भीम श्रेष्ठया प्रेरणां मचांनिसें हे मूर्तिकलाया ख्यलय् आकर्षित जुयादीम्ह मूर्तिकार श्रेष्ठं स्कुल जीवनया झ्वलय् नं थीथीकथंया पेन्टिङत यानागु अनुभव न्यंकादी ।
चितवनया पोखरा बसपार्कस्थित आदिकवि भानुभक्त माध्यमिक विद्यालयपाखें एसएलसी उत्तीर्ण यानाः सन् १९९९ लय् ललितकला क्याम्पसय् प्रमाणपत्र तहय् भर्ना जुयादीम्ह श्रेष्ठं अनं हे फाइन आर्ट विषयय् स्नातक तह तकया अध्ययन पूवंकादीगु खः ।
सन् २००४ य् स्नातक तह अध्ययन क्वचायेकाः येँया सृजना आर्ट क्याम्पसय् करिब खुला, न्हय्ला तक मूर्तिकलाया विषयय् ब्वंकेधुंकाः थप अध्ययनया निंतिं जर्मनी झायादीम्ह वय्कलं अन ब्वनेगुया नापनापं करिब खुदँया ई बिकाः थःगु हे देशय् छुं यायेमाः धइगु विचारं नेपाः लिहां वयागु कनादिल ।
‘जर्मनीं लिहां वयेधुंकाः लिपांगु १० दँ थुखे मूर्तिकारिता ख्यलय् निरन्तर लगे जुयाच्वनागु दु’, वय्कलं धयादिल, ‘मूर्तिकारिताया ख्यलय् इमान्दार व जिम्मेवार जुयाः लगे जुइ फत धाःसा रोजगारीया निंतिं मेथाय् गनं नं उखेंथुखें जुयाच्वने मालीगु अवस्था मदु ।’ ललितकलाया ख्यलय् मूर्तिकारिताया अध्ययनय् लगे जुयाच्वंपिं ल्यासेल्याय्म्हतय्त वय्कलं उच्च मनोबलयालिसें थःगु अध्ययनयात नं पूवंकेत सुझाव बियादी ।
थीथी कार्यशालय् नं सहभागि जुयादीधुंकूम्ह श्रेष्ठ सन् २००५ य् ग्वसाः ग्वःगु न्हापांगु े ‘आरम्भ’ मूर्तिकला सिम्पोजियमय् समकालीन मर्तिकारया रुपय् सहभागि जुयादीगु खः । उगु हे दँय् ग्वसाः ग्वःगु ‘हरमोनी’ अन्तर्राष्ट्रिय मूर्तिकला सिम्पोजियमय् दृश्य कलाकारया रुपय् सहभागि जुयादीगु खः । सन् २०१५ य् ग्वसाः ग्वःगु ‘रुपान्तरण’ ल्वहं मूर्तिकला कार्यशालाय् दृश्य कलाकारया रुपय् सहभागिता प्वंकादीगु खः ।
अथे हे सन्२०१७ य् ‘स्वलेवा’ मूर्तिकला कार्यशाला, सन् २०१९ य् कृति राष्ट्रिय मूर्तिकला सिम्पोजियम, ‘सृजना’ अन्तर्राष्ट्रिय मूर्तिकला सिम्पोजियम, मादी राष्ट्रिय ढुङ्गा मूर्तिकला कार्यशालालिसें सन् २०२२ य् निक्वःगु देवदह राष्ट्रिय मूर्तिकला कार्याशालाय् दृश्य कलाकारया रूपय् वय्कः सहभागि जुयादीगु खः ।
मूर्तिकलाया ख्यलय् निरन्तर लगावया लिसें वय्कलं समकालीन मूर्तिकला विधाय् सन् २०१५ या राष्ट्रिय कला प्रदर्शनीइ न्हाप सिरपाः त्याकादीगु खः । अथे हे ‘आर्ट फर नेचर’ अन्तर्राष्ट्रिय कार्यशाला अन्तर्गत समकालीन मूर्तिकला विधाय् सन् २०१५ या सर्वोत्कृट प्रकृति कलाकार सम्मानलिसें सन् २०१८ या आशाकुमारी गुरुङ ललितलका पुरस्कार नं प्राप्त यानादीधुंकूगु दु । वय्कः हालय् जक नगेन आर्ट एकेदेमिपाखें खोटाङया मझुवागढी मूर्ति कार्यशालाया अवसरय् लाकाः ग्वसाः ग्वःगु ज्याझ्वलय् ‘ललितकला डायमण्ड वर्ष नारी –२०८३’या रुपय् नं सम्मानित जुयादीधुंकूगु दु ।
मूर्तिकारिताया कारणं थः स्वरोजगार जुयादीगुया लिसें डिभाइन आर्ट स्टुडियोय् निम्हसित थप रोजगारी नं बिया वयाच्वनादीगु दु । ‘करिब निलाया अवधिया दुने १० गू लख तका बराबरया मू तुइगु मूर्ति दयेके फइ’, वय्कलं धयादिल, ‘बजारय् थीथी मूर्तिया माग नं उत्साहजनक रुपं दुगु कारणं थ्व पेशाय् इमान्दार जुयाः लगे जुयाच्वनागुलिं पश्ताय् तायेमाःगु अवस्था मदु ।’
ज्या यायां वनेबलय् गबलें गबलें निराशा वये फइगु जूसां नं हथाय् मचायेगु व थःगु ज्यायात निरन्तर न्ह्यःने यंकेत न्हूपिं मूर्तिकारतय्त वय्कःया सुझाव दु ।
LEAVE YOUR COMMENTS