लछिया दुने जुम्ल्याहा

सुं नं मिसां न्हापांम्ह सन्तान सुख प्राप्त याःगु दत्या निदँ लिपा मेम्ह सन्तान बुइकी । अझ गुलिसिनं न्हापांम्ह मचा बांलाक ब्वलने धुंकाः जक मेम्ह मचा बुइकी । तर, बंगलादेशया छम्ह मिसां न्हापांम्ह मचा बुइकूगु लछिया दुने हे हाकनं मेम्ह मचा बुइकूगु दु, व नं जुम्ल्याहा । बंगलादेशया आरिफा सुल्तान नांया २० दँ दुम्ह मिसां दकलय् न्हापां काय बुइकूगु खः । व नं ई स्वयां न्ह्यः । वयां लछिया लिपा हाकनं मचा बुइकल ।

लिपाया पालय् धाःसा जुम्ल्याहा मचा बुइकूगु खः । आरिफां वंगु फेब्रुअरी महिनाया अन्त्यपाखे काय बुइकूगु खः । वयां २६ दिं लिपा आरिफायात तसकं प्वाः स्यायेवं वया छेँजःपिंसं हथासं अस्पताल यंकल । अस्पतालय् वयागु स्वास्थ्य परीक्षण याःगु इलय् वयागु मचाछेँय् निम्ह मस्त दुगु खने दयेवं आपतकालीन ‘सिजेरियन’ शल्यक्रिया याःगु खः । शल्यक्रिया यानाः चिकित्सकतय्सं आरिफाया प्वाथं निम्ह जुम्ल्याहा मचा लिकाःगु खः ।

मां व निम्ह मचाया स्वास्थ्य ठीक जूगु धासें इमित अस्पतालं डिस्चार्ज यानाः छेँय् छ्वया बिउगु खः । बंगलादेशया जेसोर जिल्लाया अद्दीन अस्पतालया मिसा ल्वय् विशेषज्ञ डा. शीला पोद्धारं आरिफाया अस्पतालय् हयेवं वयागु अल्ट्रासाउण्ड याना स्वयागु इलय् वयागु प्वाथय् जुम्ल्याहा मचा दुगु पत्ता लगे जूगु खँ धाःगु दु ।

न्हापांम्ह सन्तानकथं काय बुइकूगु लछिया दुने हे जुम्ल्याहा मचा बुइकूगु घटनां थःपिं तसकं स्तब्ध व अजू चाःगु चिकित्सक पोद्धारं धाःगु दु । जुम्ल्याहा मस्त काय वा म्ह्याय् छु खः धइगु खँ स्पष्ट यानातःगु मदुसा मां व जुम्ल्याहा मचायात प्यन्हुतक अस्पतालय् तये धुंकाः छेँय् छ्वया बिउगु खः ।

सम्बन्धित बुखँ

LEAVE YOUR COMMENTS