फिफा विश्वकप-२०२६ : फ्रान्स स्तब्ध, स्पेन १६ दँ लिपा फाइनलय्
टेक्सास – सन् २०१० या विश्वविजेता स्पेन विश्वकप फुटबलया फाइनलय् दुहां वंगु दु । फिफा विश्वकप फुटबल २०२६ अन्तर्गत बुधवाः चान्हय् जूगु न्हापांगु सेमीफाइनलय् साविकया उपविजेता फ्रान्सयात बुकाः स्पेन १६ दँ लिपा फाइनलय् दुहां वंगु खः ।
अमेरिकाया टेक्सासस्थित डलास स्टेडियमय् जूगु कासाय् साविकया युरो कप विजेता स्पेनं फ्रान्सयात २-० गोलं बुकूगु खः । फ्रान्स विरुद्धया कासा त्याकाः स्पेन निक्वःखुुसी विश्वकपया फाइनलय् दुहां वंगु दुसा उखे लगातार स्वक्वःखुसी फाइनल म्हितेगु फ्रान्सया म्हगस त्वाःदःगु दु ।
स्पेनया विजयय् पेड्रो पोरो व मिकेल ओयारजाबलं छगू छगू गोल याःगु खः । न्हापांगु हाफया २२ औं मिनेटय् प्राप्त पेनाल्टीइ गोल यासें ओयारजाबलं स्पेनयात अग्रता बिउगु खः । कासाया छन्हु न्ह्यः जक थःगु १९ दँ बुन्हि हंम्ह लामिन यमालयात डी बक्स दुने फाउल प्रहार यायेवं स्पेनयात पेनाल्टीया ह्वःताः चूलाःगु खः । उगु पेनाल्टीय मिकेलं सही सदुपयोग यासें स्पेनयात न्हापांगु अग्रता बिउगु खः ।
निगूगु हाफया ५८ औं मिनेटय् पोरों उत्कृष्ट गोल यासें स्पेनया अग्रतायात निदुगं याःगु खः । जारी विश्वकपय् उपाधि दावेदारकथं कयातःगु नापं शुरुनिसें सशक्त कासाया प्रदर्शन याना वयाच्वंगु फ्रान्स स्पेन विरुद्धया कासाय् धाःसा निरीह थें खनेदत । बल नियन्त्रणय् तयेगु निसें फिनिसिङय् तकं स्पेनया न्ह्यःने फ्रान्सया कासा फ्यासुगु खनेदत । कासाज्वःछि फ्रान्सं निक्वः हे जक अन टार्गेट प्रहार याःगु खः ।
सन् २०१० य् न्हापांखुसी फाइनल म्हिताः उपाधितकं त्याकूगु स्पेन निक्वःखुसी फाइनलय् दुहां वंगु दु । जारी विश्वकपय् स्पेनया रक्षापंक्ति तसकं क्वातुगु खनेदत । फाइनल तकया यात्रा यायेगु झ्वलय् स्पेनं समूह चरणनिसें नक आउटया कासाय् यानाः मुक्कं छगू गोल हे जक नःगु दु । स्पेनं बेल्जियम विरुद्धया अन्तिम १६या कासाय् छगू जक गोल नःगु खः ।
फाइनलय् २० मिनेट हाफटाइम
थ्व हे झ्वलय् अमेरिकाया न्यूजर्सी रंगशालाय् नेपाःया ईकथं सोमवाः चान्हय् जुइगु फाइनल कासाय् हाफटाइमया ई २० निसें २५ मिनेट तक जुइगु धाःगु दु । थ्व ईया दुने मेडोना व के-पप बोइ ब्यान्ड (बीटीएसं) सांगीतिक प्रस्तुति बीगु ज्याझ्वः दुसा थ्व ज्याझ्वः ११ मिनेटया सुपर बोल शैलीया जुइ ।
फिफाया आधिकारि स्रोतया कथं हाफटाइमया ई नियमितकथं १५ मिनेट व पूर्वनिर्धारित योजनाकथं ११ मिनेटया सांगीतिक ज्याझ्वः जुइगुलिं हाफटाइमया ई ताःहाकः जुइगु खः ।
LEAVE YOUR COMMENTS