नेपाली यु-१९ मिसा क्रिकेट टोली एसिया कपय् छनोट

एजेन्सी – नेपाः मलेशियाय् जुयाच्वंगु एसीसी यु–१९ मिसा क्रिकेट प्रिमियर कपया सेमीफाइनलय् दुहां वंगु दु । बुधवाः जूगु कासाय् जापानयात बुकाः नेपाः सेमीफाइनलय् दुहां वंगु खः । थ्वलिसें नेपाली मिसा यु–१९ क्रिकेट टोली एसिया कपया निंतिं नं छनोट जूगु दु ।

बुधवाः जूगु क्वार्टरफाइनलय् नेपालं जापानयात ९ विकेटं बुकूगु खः । न्हापां ब्याटिङ याःगु जापानं निर्धारित २० ओभरय् ८६ रन जक दयेकाः अलआउट जूगु खः । जापानया निंतिं कप्तान बियान्का शिनों दकलय् अप्वः अविजित ३६ रन दयेकूगु खः । अथे हे जापानया निंतिं आयाने साकुराबा व किचो सुजुकीं समान १० रन दयेकल । थ्व बाहेक जापानया मेपिं सुं नं कासामिं बांलाःगु प्रदर्शन याये मफुत । नेपाःया रिया शर्मा व क्रिश्मा गुरुङं २–२, अनु कडायत, मनिषा उपाध्याय व सोनी पाख्रिनं १–१ विकेट काल ।

लिसलय् नेपालं ८७ रनया लक्ष्य ११.२ ओभरय् १ विकेटया क्षतिइ पूवंकूगु खः । नेपाःया निंतिं सावित्री धामीं अविजित ४१ रन दयेकूगु खःसा कप्तान सोनी पाख्रिन व सना प्रविणं समान १८ रन दयेकल । नेपालं कन्हय् शुक्रवाः संयुक्त अरब इमिरेट्स (युएई)लिसे सेमीफाइनल म्हिती ।

नेपालं ग्लोबल छनोट म्हितीगु
थ्वहे झ्वलय् नेपाली राष्ट्रिय क्रिकेट टिमं सन् २०२८ या टि–२० विश्वकपया निंतिं तप्यंक ग्लोबल छनोट म्हितीगु जूगु दु । विश्व क्रिकेटया सर्वोच्च निकाय अन्तर्राष्ट्रिय क्रिकेट परिषद् (आईसीसीं) सन् २०२८ या टि–२० विश्वकपया छनोट प्रक्रिया सार्वजनिक याःगु इलय् नेपालं तप्यंक हे ग्लोबल छनोट म्हितीगु जूगु खः ।

आईसीसीयाकथं सन् २०२६ या टि २० विश्वकप म्हितूगु तर स्वतः विश्वकपय् थाय् दयेके मफुगु टोलीत तप्यंक हे ग्लोबल छनोटय् दुहां वनीगु जूगु दु ।