चीन-अमेरिका तिब्बत मामिलाय् हाकनं आमनसामने

एजेन्सी – चीन व अमेरिका दथुइ तिब्बतयात कयाः जुयाच्वंगु असहमतिया दथुइ निगुलिं देशं निगुलिं देय्या अधिकारीतय्त भिसाय् प्रतिबन्ध तःगु दु। निगू देय् दथुइ थीथी मुद्दाय् न्ह्यानाच्वंगु विवादया झ्वलय् तिब्बतया मुद्दा हाकनं ब्वलंगु खः ।

अमेरिकां छन्हु न्ह्यः तिब्बतया मामिलायात कयाः छुं चिनियाँ अधिकारीतय्त अमेरिकाय् वयेत प्रतिबन्ध तयेगु घोषणा याःगु खः । थुकिया लिसलय् चीनं नं छन्हु लिपा हे अमेरिकाया तिब्बतया मामिलाय् गलत व्यवहार यानाच्वंपिं मनूतय्त प्रतिबन्ध तयेगु घोषणा याःगु खः ।

मंगलवाः जक अमेरिकी विदेशमन्त्री माइक पोम्पियों चीनया अधिकारीतय्त अमेरिकी कानुन कथं प्रतिबन्ध तयागु खँ धयादीगु दु। अमेरिकां तिब्बतया स्वायत्तताया माग याना वयाच्वंगु दु। उकिं चीनं अमेरिकीतय्त तिब्बत क्षेत्रय् वनेत न्हापां निसें प्रतिबन्ध तयातःगु दु ।

पोम्पियों मंगलवाः पितबिउगु वक्तव्यय् धयातःगु दु, ‘दुर्भाग्य धायेमा कि चीनं अमेरिकी राजनीतिज्ञ व मेमेपिं अधिकारीतय्त तिब्बत स्वायत्त क्षेत्र व तिब्बतया मेमेगु लागाय् वनेत पनातःगु दु। थुकीपत्रकार व पर्यटकत नं दुथ्याः । तर अमेरिकाय् धाःसा चीनया नागरिक व अधिकारीतय्त थज्याःगु रोकटोक गनं नं मदु।’

‘उकिं आवंलिं अज्याःपिं अधिकारीत, गुपिंसं विदेशीतय्त तिब्बतय् वये वने यायेत पनातःगु खः उमित अमेरिकाय् दुहां वयेत नं प्रतिबन्ध तयागु दु’ वय्कलं धयादीगु दु। तर अमेरिकी विदेश मन्त्रालयं अज्याःपिं चिनियाँ अधिकारीतय् नां नं धाःगु मदुसा उमिगु ल्याः नं धाःगु मदुनि ।

अमेरिकाया थ्व प्रतिबन्ध लिपा चिनियाँ विदेश मन्त्रालयं तुरुन्त प्रतिक्रिया बिसें अमेरिकाया थ्व पलाःया कडा विरोध याःगु खः । विदेश मन्त्रालयया प्रवक्ता जाओ लिजियानं अमेरिकां तिब्बत सम्बन्धी मुद्दा ल्ह्वनाः चीनया आन्तरिक मामिलाय् हस्तक्षेप याःगु तुरुन्त दिकेमाः धाःगु दु।