स्वेच्छिक मृत्युया निंतिं …..

जहांनिया राणा शासन व पंचायतकालय् जनपक्षीय विचारधारा सम्प्रेषण यायेगु व अन्याय–अत्याचारया विरुद्ध सःतःपिंत देशं पितिउँगु खँ झीसं न्यना वयाच्वनागु खः । थौं देशय् संघीय लोकतान्त्रिक शासन व्यवस्था वयेधुंकाः नं थनया जनजीवन सहज मजूगु धासें आपालं मनूत छेँजःपिं सकलें विदेश पलायन जुइगु क्रम जारी हे दु ।

तर मनुखं थःगु इच्छा मृत्युया निंतिं छेँ जकमखु थःगु देय् हे त्वःता वंगु घटना धाःसा झीसं आतक न्यनागु मदु । अस्टे«लियाया छम्ह १०४ दँ दयेधुंकूम्ह मनुखं स्वेच्छिक मृत्युया निंतिं थःगु छेँ जक मखु, देय् हे त्वःताः वंगु दु व नं छम्ह वैज्ञानिक थेंज्याःम्ह मनुखं । वैज्ञानिक डेभिड गुडअलं स्वेच्छिक मृत्युया निंतिं छेँ जकमखु देय् हे त्वःताः वंगु दु ।

थःगु जीवन अन्त्य यायेत धासें वैज्ञानिक गुडअल मृत्युया यात्राय् पिहां वंगु खः । वैज्ञानिक गुडअल बोटानी व इकोलोजिया वैज्ञानिक खः । बेलायतय् जन्म जुयाः अस्टे«लियाय् च्वना वयाच्वंम्ह गुडअल सछिदँ पुले धुंकूसां वयागु स्वास्थ्यय् आतक छुं अज्याःगु तःधंगु समस्या वःगु धाःसा मदुनि ।

थ्व उमेरय् तक म्वानाच्वंसां थःगु स्वतन्त्रता लाकाकाःगु गुडअलया धापू दु । छुं दिं न्ह्यः जक थःगु बुन्हिया झ्वलय् अस्टे«लियन ब्रोडकास्टिङ कर्पोरेसनयात गुडअलं धाःगु खः, ‘जितः थ्व उमेरतक थ्यंगु इलय् तसकं पश्ताय् चाः, जि लय्तायाच्वनागु मदु, उकिं जिं याकनं सी मास्ति वः ।’

थगुने जक अस्ट्रेलियाया छगू राज्यं ताःईतक न्ह्याःगु विवाद लिपा ‘असिस्टेड डाइङ’यात कानुनी मान्यता बिउगु खः । यद्यपि थ्व मान्यता गम्भिर प्रकृतिया ल्वचं कःपिनिगु निंतिं जक खः । गुडअलयात अज्याःगु गम्भिरकथंया गुगुं ल्वय् मजूगुलिं स्वेच्छिक मृत्युया मान्यता मबिउगुलिं वं देय् त्वःता वनेमाःगु खः ।

छुं दिं न्ह्यः जक पर्थस्थित छखा पुलांगु फ्ल्याटय् याकःचा हे च्वना वयाच्वंम्ह गुडअल दयाः अशक्त जुइवं चिकित्सकतय्सं वयात छेँय् हे आराम यायेत व सुसाःकुसाःया आवश्यक दुगु सुझाव बिउगु खः । तर गुडअलं सुं म्हमसिउम्ह मनूपाखें सुसाःकुसाः याकाः च्वनेगु स्वयां ‘स्वेच्छिक मृत्यु’ सम्मानजनक जुइ धासें उकिया हे योजनाकथं देय् त्वःताः पिहां वंगु खः ।