यमनया विद्रोहीत विरुद्ध साउदीया हवाइ आक्रमण

साउदी अरेबियां यमनया एडेनय् हवाई आक्रमण याःगु दु । यमनय् सक्रिया पृथकतावादी पुचः दक्षिणी संक्रमणकालिन परिषद् (एसटिसी) लिसे आवद्ध सेनाविरुद्ध थ्व हवाई आक्रमण जूगु खः । साउदीया छम्ह अधिकारीं यमनया एडेनय् च्वंगु सरकारी संस्थाय् आक्रमण यानाच्वंपिं एसटीसीविरुद्ध थ्व हवाई कारवाही जूगु खः ।

थ्व ख्याच्वः कथं न्हापांगु कारवाही जूगु खँ नं उम्ह अधिकारीं धाःगु दु । सउदीया हवाइ आक्रमण लिपा एसटीसीलिसे आवद्ध सेनां थःपिं गन्तव्य पाखे लिहां वनागु खँ धाःगु दु । राष्ट्रपतिया ज्याकु व सरकारी सुरक्षा फौजया अखडाय् तकं कब्जा यायेधुंकूगु एसटीसीं साउदी सरकारया इनापयात स्वीकार यानागु खँ धाःगु दु ।

एसटिसीया प्रवक्तां पित बिउगु छगू वक्तव्यय् यमन सरकारलिसे वार्ताय् सहभागी जुइत साउदीं याःगु इनापयात लसकुस याना धयातःगु दु । यमन युद्धय् ब्वति कयाच्वंगु साउदी गठबन्धनं शनिवाः एसटीसीयात एडेनय् तत्काल युद्ध विराम लागू यायेत चेतावनी बिउगु खः । साउदी सञ्चार माध्यमतय् कथं साउदी गठबन्धनं यदि युद्धविराम यात धाःसा थप हवाइ कारवाही यायेगु चेतावनी नं बिउगु दु ।

थौंकन्हय् यमनया राजधानीयात हुथी बिद्रोहीतय्सं कब्जा कयातःगु कारणं साउदीं मान्यता बियातःगु सरकारं एडेनयात अस्थायी राजधानी दयेकातःगु दु । एडेनय् सक्रिय एसटिसीयात धाःसा साउदी गठबन्धनय् हे दुथ्याःगु युएईं आर्थिक व सैनिक ग्वाहालिबियाच्वंगु यमन सरकारं द्वपं बियाच्वंगु दु ।

यमन सरकारं सन् २०१५ निसें एडेनयात राजधानी दयेकाः ज्या यानाच्वंगु दु । सन् २०१४ निसें सुरु जूगु गृहयुद्धया कारणं हजारौं मनूतय् ज्यान वनेधुंकूगु दुसा हुथी विद्रोहीतय्सं राजधानी साना लिसें अप्वः धयाथें भूभागय् कब्जा यानातःगु दु ।

सम्बन्धित बुखँ

LEAVE YOUR COMMENTS