ने. सं. ११४४ कौलाथ्व तृतीया -

९२ दँया महाथिर मलेसियाया प्रधानमन्त्री जुल

मलेसियाय् ९२ दँया पुलांम्ह प्रधानमन्त्री महाथिर मोहम्मद हाकनं सत्ताय् लिहां वइगु जूगु दु । महाथिरया पार्टीं सन् १९५७ निसें लगातार सत्ताय् च्वनाच्वंगु दलयात आम चुनावय् पराजित यासें राजनीतिक हाकनं शानदार पुनरागमन याःगु खः ।
आम चुनावया इलय् ९२ दँया महाथिरं छगू इलय् थःम्हं हे नेतृत्व याना वयाच्वनागु बारिसन नाशिओनल पार्टी व थःम्हं हे हुर्के यानाम्ह नेता नजिब रजाकयात हाथ्या बीत हाकनं राजनीति लिहां वयेगु घोषणा याःगु खः ।

प्रधानमन्त्री नजिबया कार्यकालय् ताःई न्ह्यवनिसें भ्रष्टाचारया द्वपंपयात बेवास्ता यानाच्वंगु खः । वय्कःया शासनकालय् मलेशियाय् मूल्यवृद्धि तच्वयेगु लिसें जातीय तनाव नं खनेदुगु खः ।९२ दँया महाथिरया पक्षय् वःगु चुनावी लिच्वःयात यक्व हे विश्लेषकतय्सं नाटकीय लिच्वः धाःगु दु ।

सरकार गठन यायेत ११२ सिट आवश्यक दुगुलिं महाथिरया नेतृत्वय् दुगु विपक्षी दलं ११५ सिट त्याकूगु खः । महाथिरया विजयं देश स्वतन्त्र जुसांनिसें सरकारया नेतृत्व याना वयाच्वंगु पार्टीया शासनकाल नं अन्त्य जूगु दु ।सरकारया नेतृत्व याइम्ह महाथिर आः विश्वया ज्याथपिं नेतात मध्ये छम्ह जुइगु जूगु दु ।

आःतक सरकारया नेतृत्व याःपिं ज्याथपिं नेता मध्ये मलावीया पुलांम्ह राष्ट्रपति डाक्टर हेस्टिङ्स बन्डाया नां न्ह्यःने वइ । बन्डां सत्ता त्वःतूगु इलय् ९६ दँ स्वयां अप्वः दयेधुंकूगु खः ।

अथेहे जिम्बाब्वेया नेता रोबर्ट मुगाबें नं ९३ दँय् थ्यनेधुंकाः जक थःगु पदं राजीनामा बियादीगु खः । ९२ दँ दुम्ह महाथिरं आः पूवंक कार्यकाल शासन यात धाःसा दकलय् ज्याथम्ह राष्ट्रप्रमुख जूगु कीर्तिमान च्वनेफु ।