तालिबानपाखें पञ्जशीर कब्जाय् कयागु घोषणा

तालिबानं अफगानिस्तानया राजधानी काबुलया उत्तरय् लाःगु पञ्जशीर प्रान्त कब्जाय् कयागु घोषणा याःगु दु । राजधानी काबुलय् जूगु पत्रकार सम्मेलनय् तालिबानया प्रवक्ता जबिहुल्लाह मुजाहिदं पञ्जशीर उपत्यकायात पूर्णरुपं थःपिंसं कब्जाय् कयागु व तालिबान विरोधी पुचः नेसनल रेसिस्टेन्स फोर्स ( एनआरएफ) असफल जूगु धाःगु खः ।

प्रवक्ता मुजाहिदं तालिबानं एनआरएफलिसे वार्ता यायेत स्वयागु खःसां एनआरएफं वार्तायात सकारात्मक रुपं मकाःगु नं धाःगु दु । पत्रकार सम्मलेनय् मुजाहिदं पञ्जशीरय् बन्द जुयाच्वंगु मत, फोन व इन्टरनेट सेवा हाकनं सुरु जुइगु जानकारी नं बिउगु दु । पत्रकार सम्मेलनय् मुजाहिदं एनआरएफया समर्थन यानाच्वंम्ह अफगानिस्तानया पूर्व उपराष्ट्रपति अमरुल्लाह सालेह अफगानिस्तान त्वःताः ताजिकिस्तानय् बिसिउँ वनेधुंकूगु व मेपिं नेतात गन दु धयागु जानकारी थःपिंके मदुगु नं धाःगु दु । अथे हे प्रवक्ता मुजाहिदं अफगानिस्तानय् घरेलु उडान शुरु जुइधुंकूगु व याकनं हे अन्तर्राष्ट्रिय उडान जुइगु नं धाःगु दु ।

अफगानिस्तानय् काबुल विमानस्थलया सेवा शुरु यायेत टर्की व कतारं ग्वाहालि यानाच्वंगु जानकारी नं मुजाहिद बिउगु दु । मुजाहिदं अमेरिकां विमानस्थलय् नोक्सान यानाथकूगु नं धाःगु दु । सोमवाः जूगु पत्रकार सम्मलेनय् प्रवक्ता मुजाहिदं तालिबानं सरकार गठन याइगु विषयलय् धाःसा ठोस जानकारी मबिउ । मुजाहिदं समावेशी सरकार जुइगु खँ धाःसा धाःगु दु । मिस्त समाजया महत्वपूर्ण अंग जूगु नं मुजाहिदं धाःगु दु ।

पाकिस्तानलिसेया सीमाया विषययात कयाः नं मुजाहिद नवाःगु खः । अथे हे तालिबानया शीर्ष नेता हिब्तुल्लाह अखुन्दजादा मसीनिगु व याकनं हे सार्वजनिक जुइगु जानकारी नं बिउगु खः ।
थुखे एनआरएफया नेता अहमद महसुदं तालिबानं पञ्जशीरयात पूर्णरुपं कब्जाय् कयागु धकाः याःगु घोषणाया खण्डन याःगु दु । नेता अहमदं ट्विट यानाः थःपिं सुरक्षित जूगु जानकारी नं बिउगु दु । एनआरएफ तालिबानलिसे ल्वानाच्वंगु नं नेता महसुदं धाःगु दु ।

सम्बन्धित बुखँ

LEAVE YOUR COMMENTS