निम्ह अन्तरिक्षयात्री पृथ्वीइ कुहांवल

एजेन्सी – अन्तर्राष्ट्रिय अन्तरिक्ष केन्द्र (आइएसएस)य् वनाच्वंपिं निम्ह अन्तरिक्षयात्री बब बेन्कन व डग हर्ली म्हिगः सुथय् पृथ्वीइ लिहां वःगु दु । स्पेस एक्स ड्रयागन क्याप्सुल नांया अन्तरिक्षय् यानाय् च्वना वःपिं थुपिं अन्तरिक्ष यात्रीतय्सं अमेरिकाया पश्चिमी फ्लोरिडाय्च्वंगु पेन्साकोलाया तटया दक्षिण पाखे च्वंगु गल्फ अफ मेक्सिकोय् अवतरण याःगु खः । उपिं अन थ्यनेवं उद्धारया निंतिं तयार जुयाच्वंगु पानीजहाजं उमित यानं पिकयाहःगु खः ।

अमेरिकाया छुं नं मानवसहितया अन्तरिक्ष यात्र लखय् अवतरण जूगु थ्व ४५ दँ लिपा न्हापांखुसी खः । ४५ दँ न्ह्यः अपोलो कमान्ड मोड्युलं थथे हे लखय् अवतरण याःगु खः । अन्तरिक्ष यात्रीत लिहांवःगु क्याप्सुल अवतरणया निंतिं प्यंगः प्यारासुट छ्यःगु खः । करिब ५६० किलोमिटर प्रतिघण्टाया गतिं कुहां वःगु उगु क्याप्सुलया गतियात प्यारासुटं समुद्रया लखय् थिउगु इलय् तक प्रतिघन्टा २४ किलोमिटरय् सीमित यानाबिउगु खः । अवतवरण लिपा अन्तरिक्षयात्रीतय्त चिकित्सकतय्सं परीक्षण याःगु खः ।