७०० यात तालिम, १५० यात दसिपौ
येँ (नेपालभाषा टाइम्स) – येँ महानगरपालिका २७ वडां वंगु दछिया दुने न्हय्सःयात थीथी सीपमूलक, आयमूलक, रोजगारमूलक, क्षमता अभिवृद्धि तालिम बिउगु दु । २७ वडां थ्व वंगु दछिया दुने गायन, वाद्यवादन, हुलाप्याखं, इलेक्ट्रिक तथा इलेक्ट्रोनिक, हस्पिटालिटी लगायत थीथी विधाय् तालिम बिउगु खः । तालिम काःपिंमध्ये सत्याःम्हेसित छगू ज्याझ्वःया दथुइ दसिपौ लःल्हाःगु दु ।
येँ महानगरपालिकाया कार्यवाहक प्रमुख सुनिता डंगोलया प्रमुख आतिथ्यताय् जूगु ज्याझ्वलय् स्यानिटरी प्याड उत्पादन, बेकरी, बारिस्ता, मोबाइल जर्नालिज्म, टुर अपरेटर व उद्घोषण तालिम काःपिं सत्याम्ह प्रशिक्षार्थीपिंत दसिपौ लःल्हाःगु खः ।
उगु इलय् कार्यवाक प्रमुख डंगोलं तालिम काःपिंत रोजगार वा स्वरोगार यायेगु उद्देश्य तयागु दु धासें छम्हेसिनं हे दक्वं तालिम कायेगु स्वयां नं थःत यःगु, रुचि दुगु विषयय् दक्ष जुइकथं तालिम कायेमाः धयादिल ।
२७ वडाअध्यक्ष योगेश खड्गीं थ्व वंगु दछिया दुने थीथी छगू दर्जन विधाय् न्हय्सःयात प्रशिक्षण बियागु खँ कनादिसें तालिमय् परम्परागत सीपनिसें अत्याधुनिक व प्रविधिजन्य विषयय् प्रशिक्षण बियागु खँ कनादिल ।
तालिम काःपिंमध्ये गुलिखेसिनं व्यवसाय तकं संचालन यायेधुंकूगु व गुलिखेसिनं तालिम कयाः प्रशिक्षक तकं जुइधुंकूगु वडाअध्यक्ष खड्गीं कनादिल । वय्कःयाकथं चाःया ख्वाःपाः दयेकेगु तालिम काःपिंसं थःपिंसं हे व्यवसाय शुरु याःगु व बारिस्ताया प्रशिक्षण काःपिंसं थःपिं हे प्रशिक्षक जुइधुंकूगु दु ।
धिमे प्याखं, जुम्बा, पौडी, मस्तय् निंतिं फुटबल स्तरोन्नतिया तालिम संचालन यायेधुंगु व आः याकनं हे कम्प्युटरय् आधारित तालिम संचालन यायेत्यनागु नं वय्कलं कनादिल ।
LEAVE YOUR COMMENTS