ने. सं. ११४४ कछलागा सप्तमी -

सितिकं पिज्जा भपियादिसँ

प्रविधि जगतय् मोबाइल मनूतय् निंतिं अपरिहार्य जुइधुंकूगु दु । अझ मानव जीवनया छगू अभिन्न अंग हे धाःसां छुं पाइमखु । न्ह्यागु इलय् नं मनूत मोबाइलय् जक सनाच्वंगु खने दइ । अले मनूलिसे न्ह्याबलें नापं दयाच्वनीगु नं मोबाइल हे जुइधुंकल । नःसां, द्यंसां, च्वये ब्वने याःसां, चःबिइ वंसां नं मोबाइल मदयेकं मगाः ।

थज्याःगु अवस्थायात ध्यानय् तयाः अमेरिकाया क्यालिफोर्नियाया छगू रेष्टुरेन्टं छगू अभियान हे न्ह्याकूगु दु । मोबाइल फोनप्रति थुभनं लगे जूगु नशायात चिइकेगु निंतिं क्यालिफोर्नियाया छगू फास्ट फुड रेष्टुरेन्टं सितिकं ‘पिज्जा’ इनेगु याना हःगु दु । उगु रेष्टुरेन्टय् नः वनीपिं गाहाकिं थःगु मोबाइल लकरय् तयेमाः ।

मोबाइल लकरय् तल धाःसा अर्डर हे मयाःसां उम्ह गाहाकियात सितिकं पिज्जा बी । लकरय् मोबाइल तःपिं आतक न्यय्म्हेसित तपाःगु साइजया पिज्जा डेलिभरी यायेधुंकूगु दु ।मोबाइल लकरय् तये हे माः धइगु छुं अनिवार्य धाःसा मदु । मोबाइल लकरय् तयेगु वा मतयेगु अधिकार गाहाकियात हे निहीत जुइ ।

थ्व अभियान शुरु जूगु लाक्कं स्ववाः तिनि दत । ‘फ्रि पिज्जा’ प्रावधानया कारणं अन पुचः पुचः हे मनूत वइगु आशा याःगु खः । तर गुलि गाहाकि वइगु आशा याःगु खः, उलि धाःसा वयाच्वंगु मदु । लकरय् मोबाइल तये न्ह्यः उकिया जांच नं जुइ, छाय्कि मनूतय्सं सितिकं पिज्जा नयेगु लोभं स्यंगु वा पुलांगु मोबाइल लकरय् मतयेमा धकाः खः ।