ने. सं. ११४६ दिल्लागा आमै -

कोलम्बिया शक्तिशाली भुखाय् : उद्धार व खोज अभियान जारी

बोगोटा – वंगु सोमवाः दक्षिण अमेरिकी देय् कोलम्बियाय् वःगु शक्तिशाली भुखाचय् लाःपिंत उद्धार यायेगु व भग्नावशेषय् ल्हानाच्वंपिंत मालेगु ज्या अझं न्ह्यानाच्वंगु दु । उद्धारकर्मीत चान्हि मधासे भग्नावशेषय् ल्हानाच्वंपिंत उद्धार व मालेगु ज्याय् मदिक्क लगे जुयाच्वंगु दु ।

लिपांगु छगू जानकारीकथं आतकया दुने भुखाचय् लानाः १८० सीगु पुष्टि जुइधुंकूगु दु । भुखाचं दकलय् अप्वः काली व पेरेरा सहरयात प्रभावित याःगु दु । थुपिं निगुलिं सहरय् दकलय् अप्वः क्षति याःगु दुसा मानवीय क्षति नं थुपिं निगू सहरय् दकलय् अप्वः जूगु अनया संचारमाध्यमतय्सं न्ह्यथंगु दु ।

वंगु सोमवाः स्थानीय ईकथं सुथसिया ७:३४ मिनेटय् होसे डेल पाल्मारयात केन्द्रविन्दु दयेकाः ७.४ म्याग्नेच्युडया भुखाय् ब्वःगु खः । भुखाय् धक्का सलंसः माइल तापाःगु पश्चिम कोलम्बियाय् तकं महसुस याःगु खः । तःधंगु भुखाय् लिपा वइगु धक्का (पराकम्प)या महसुस मंगलवाः नं जूगु खः । कोलम्बियाया जःलाखःला देय् भेनेजुएला, पानामा व इक्वेडरय् तकं महसुस याःगु खः ।

सरकारी तथ्यांकं १८१ म्ह सीगु धाःगु दुसा स्थानीय अधिकारीतय्सं उपलब्ध याकूगु तथ्यांक नापं स्वायेबलय् सीपिनिगु ल्याः २४० स्वयां अप्वः थ्यने फुगु समाचार संस्थातय्सं न्ह्यथंगु दु ।

राष्ट्रपति एबेलार्डो डे ला एस्प्रिएलां देशय् राष्ट्रिय आपतकालया घोषणा याःगु दु । मंगलवाः भुखाचं दकलय् अप्वः प्रभावित सहरमध्ये पेरेरा थ्यंकः वःम्ह राष्ट्रपति एस्प्रिएलां सीपिं बाहेकं करिब नीखुसःम्ह घाःपाः जूगु व निसः स्वयां अप्वः अझं तनाच्वंगु धाःगु दु । राष्ट्रपति एस्प्रिएलायाकथं भुखाचं ११०० स्वयां अप्वः छेँ पूर्णरुपं ध्वस्त जूगु दुसा करिब च्याद्वःखा स्वयां अप्वः छेँ क्षति जूगु दु ।

सोमवाः सुथय् भुखाय् ब्वयेवं बहनिनिसें मंगलवाःतकं पेरेरा व काली सहरया आपालं मनुखं छेँ पिने हे चा छ्याःगु खः । गुलिखे मनूतय् छेँ ध्वस्त जूगु दुसा गुलिखे मनूया छेँ दुना वइगु ग्याःचिकुं यानाः पिने हे चा छ्यायेत बाध्य जूगु खः ।

नीनिगू लखं मल्याक जनसंख्या दुगु काली सहरय् जक ९५ म्ह सीगु पुष्टि याःगु दु । उद्धारया ज्यायात समन्वय यायेत छगू एकीकृत कमान्ड पोस्ट स्थापना यानातःगु दु । काली सहरया मेयर अलेहान्द्रो एदेरं २३९ म्ह भग्नावशेष दुने तनाच्वंगु व ९४९ म्ह घाःपाः जूगु जानकारी बिउगु दु ।

थनया छगू अस्पतालया च्वय्या तँ दुना वयेवं ल्वगित दुने हे फसे जूगु खःसा सहरया उत्तरी क्षेत्रय् च्वंगु कालिमामाय् च्वंगु छगू ब्वनेकुथिया भवन दुनाः प्यम्ह मस्त सीगु दु । भुखाय् लिपा सम्भावित लुटपाटया जोखिमयात ध्यानय् तयाः सहरय् कफ्र्यु आदेश जारी यानातःगु दु ।