सिंहयात नं कोरोना, न्हूगु भेरियन्ट वइगु खतरा
एजेन्सी÷ दक्षिण अफ्रिकाया छगू चिडियाखानाय् च्वंम्ह सिंह व प्युमायात कोरोना भाइरस खनेदयेवं उमिपाखें कोरोनाया न्हूगु भेरियन्ट उत्पत्ति जुइफइगु खतरा खनेदुगु दु । सिंह व भौचा प्रजातिया जनावर प्युमायात चिडियाखानाय् ज्या याइपिं कर्मचारीतय् पाखें कोभिड सरे जूगु अनुमान वैज्ञानिकतय्सं याःगु दु । प्रीटोरिया विश्वविद्यालयया वैज्ञानिकतय्सं भाइरस जनावरतय्त सरे जुयाः उमिपाखें हाकनं मनूयात सरे जुल धाःसा न्हूगु भेरियन्ट उत्पत्ति जुइगु खतरा दुगु खँ धाःगु दु ।
चिडियाखानाय् दुपिं थुपिं जनावरतय्त मनूतय्त कोभिड जुइबलय् थेंज्याःगु हे लक्षण खनेदुगु खः । उमित सासः ल्हाये थाकुगु, न्हासं न्हि तुलुतुलु वइगु व सुख्खा मुसु वइगु जूगु खः ।
उमित कोभिडया लक्षण खनेदयेवं यानास्वःगु अनुसन्धान कथं चिडियाखानाय् ज्या याइपिं मनूतय्पाखें हे उमित कोभिड सरे जूगु खनेदुगु खः । तर अन ज्या याइपिं मनूतय्के धाःसा लक्षण खनेमदुगु खः ।
वैज्ञानिकतय्सं जनावरतय् हेरबिचाः यायेबलय् नं मास्क तया जुइत व मेमेगु सुरक्षा उपाय नालेत धाःगु दु ।
LEAVE YOUR COMMENTS