जहाजया चःबिइ सीम्ह मचा लुइवं…

येँ (नेपालभाषा टाइम्स)- युएईं नेपाः वःगु जहाजया चःबिइ मचाया सीम्ह लूगु दु । युएईया शारजहाँपाखें म्हिगः सुथय् नेपाःपाखे वःगु एयर अरेबियाया जहाजया चःबिइ मचाया सीम्ह वानातःगु अवस्थाय् लूगु खः ।

जहाजं फुक्क यात्रुत पिहां वनेधुंकाः सरसफाइया कर्मचारीतय्सं चःबि सफा याः वंबलय् अन साः सहितया सीम्ह मचा लुइकूगु खः । वयां लिपा तत्काल प्रहरीयात खबर यानाः सीम्ह मचायात त्रिवि शिक्षण अस्पताल यंकूगु खःसा अस्पतालं मचा सीधुंकल धकाः घोषणा याःगु खः ।

अनुसन्धानया झ्वलय् उम्ह मचा वहे जहाजय् च्वना वःम्ह नवलपरासीया छम्ह मिसां बुइकूगु खँ पत्ता लगे जूगु खः । उम्ह मिसायात विमानस्थलं तुं कर्मचारीतय्सं ज्वंगु दुसा वयां लिपा वयात नं सिनामंगलय् च्वंगु केएमसी अस्पतालय् भर्ना याःगु दु । मिसा वैदेशिक रोजगारं लिहां वःम्ह जुइमाः धकाः अनुमान याःगु खः ।