सामाजिक संजाल गलत प्रयोग ५ निसें १५ लाख जरिवाना
सामाजिक संजाल वा विद्युतीय माध्यमया प्रयोग यानाः सुयातं हायेकेगु वा क्वह्यंकेगु यानाच्वनादीगु दु ला ? वा न्ह्यइपुकेगु ला खः नि धासें विद्युतीय मध्यमय् सुयागु अपमान जकं यानाच्वनादीगु ला मदु ? यदि अथे यानाच्वनादीगु दु धइगु खःसा आः छितः कडा कारवाही जुइफु । न्ह्यइपुकेगु निंतिं ला खःनि, व ला जिमि हे मनू खः, जिं म्हसिउम्ह हे खः धकाः वास्ता तकं याये मदइगु व्यवस्था याःगु दु ।
सरकारं संघीय संसदय् पेश याःगु व वंगु बुधवाःनिसें सहलह तकं शुरु जूगु ‘सूचना प्रविधिसम्बन्धी विधेयक–२०७५’य् अज्याःगु ज्या याइपिंत दण्डनीय अपराधया रुपय् ब्याख्या याःगु दु । विद्युतीय माध्यमयात सभ्य, मर्यादित व व्यवस्थित दयेकेगु लक्ष्ययालिसें सरकारं उगु विधेयक संघीय संसदय् न्ह्यब्वःगु खः ।
सामाजिक संजाल वा विद्युतीय प्रणालीया प्रयोग यानाः मेम्ह मनूयात निरन्तर रुपय् हैरान यायेगु, हायेकेगु वा हायेके थेंज्याःगु क्रियाकलापयात विधेयकं दण्डनीय अपराधन माने यासें कारवाहीया भागिदार जुइमाःगु विषययात स्पष्टरुपं ब्याख्या याःगु दु । सुयातं क्वह्यंकेगु, हतोत्साहित यायेगु, अपमान यायेगु वा ख्यायेगु व ब्वः बीगु थेंज्याःगु ज्या यायेत बर्जित याःगु दु ।
अज्याःगु ज्या जुल, याकल धाःसा कसुरदारयात कसुरया मात्रा स्वयाः १० गू लाख तक जरिवाना वा न्यादँया कैद वा निगुलिं सजाय जुइगु व्यवस्था याःगु दु । विधेयकया दफा ८५ लय् समावेश जूगु यौनजन्य दुव्र्यवहार याये मजिउगु शीर्षकय् धयातःगु दु, ‘सुना नं विद्युतीय प्रणालीमार्फत सुयातं प्रचलिक कानूनबमोजि यौनजन्य दुव्र्यवहार माने जुइगु छुं नं ज्या यायेत व उकिया निंतिं सुयातं अनुचित प्रलोभनय् लाकेगु वा ख्याच्वः बीगु थेंज्याःगु ज्या यायेगु वा याके दइमखु ।’
अज्याःगु यात वा याकल धाःसा अज्याःगु हे कसुरया मात्रा स्वयाः न्यागू लाख तक जरिवाना, न्यादँया कैद वा निगुलिं सजाय जुइगु व्यवस्था याःगु दु । विद्युतीय प्रणालीया माध्यमपाखें छुं नं अश्लील सामग्री उत्पादन, संकलन, उपलब्ध जूगु जानकारी सम्प्रेषण, वितरण, प्रकाशन, प्रदर्शन, प्रचार प्रसार व विक्री तकं याये दइमखु ।
थुकथं हे विधेयकं विद्युतीय प्रणालीमार्फत प्रलोभनय् लाके मजिउगु व प्रणालीया दुरुपयोग याये मजिउगु विषययाततकं कडां रुपं कानूनी प्रबन्ध याःगु दु । यौन शोषण यायेगु वा ठगी यायेगु वा मेगु गुगुं नं गैरकानूनी ज्या यायेगु मनसाय तयाः प्रस्ताव तल धाःसां नं दण्ड सजायया भागिदार जुइमाली ।
अथे हे विद्युतीय माध्यमपाखें नेपाःया सार्वभौमसत्ता, अखण्डता, राष्ट्रियता वा राष्ट्रिय एकता, स्वाधीनता वा संघीय इकाइ दथुया सम्बन्धय् लिच्वः लाये फइगु छुं नं ज्या याये मदइगु व्यवस्था विधेयकं याःगु दु । अज्याःगु कसुर यात धाःसा १५ गू लाखतक जरिवाना वा न्यादँया कैद वा निगुलिं सजाय जुइगु व्यवस्था याःगु दु ।
अनुमति मकासे विवरण संकलन याये मदइगु छिगु विद्युतीय स्वरुपय् दयाच्वंगु व्यक्तिगत विवरण सुनानं गलत तवरं ला प्रयोग यानाच्वंगु मदु ? यदि दु धइगु खःसा आः अयाःगु ज्या यायेगु दण्डनीय अपराध जुइ । विधेयकय् प्रचलित कानूककथं बाहेकं सुनानं विद्युतीय स्वरुपय् दुगु वैयक्तिक विवरण संकलन याये मदइगु व्यवस्था याःगु दु ।
गैरकानूनी रुपय् वैयक्तिक विवरण संकलन याइम्हेसित उगु विधेयकया सूचना सुरक्षा तथा गोपनीयतासम्बन्धी व्यवस्थां बर्जित यानातःगु दु । वैयक्तिक विवरण हे संकलन यायेमाःसा उगु विवरण छुकिया प्रयोजनया निंतिं आवश्यक जूगु खः, उकिया जानकारी सम्बन्धित व्यक्तियात अनिवार्य रुपय् बुझे यायेमाः ।
छुं नं जानकारी तकं मबिसे गैरकानूनी रुपय् सुं सुयागु नं वैयक्तिक विवरण काल धाःसा वा अनाधिकृत रुपय् प्रयोग यात धाःसा न्यागू लाख तक जरिवाना वा स्वदँया कैद वा निगुलिं सजाय जुइगु विधेयकय् व्यवस्था यानातःगु दु । अथे हे वैयक्तिक विवरण वा सूचना संकलन यायेबलय् खुले यानातःगु प्रयोजनया निंतिं बाहेक मेगु प्रयोजनया निंतिं प्रयोग, प्रचारप्रसार व कालबिल यायेगु तक प्रस्तावित विधेयकं बर्जित यानातःगु दु ।
छगू उद्देश्य तयाः विवरण संकलन यायेगु व मेगु प्रयोजनया निंतिं अज्याःगु विवरण प्रयोग यात धाःसा कानूनकथं दण्ड सजाय फयेततकं तयार जुइमाःगु व्यवस्थायात कानूनय् दुथ्याकातःगु दु । खास प्रयोजनया निंतिं कानूनकथं संकलन, व संचय यानातःगु वैयक्तिक सूचना संकलन व संचयया प्रयोजन सिधःगु ३० न्हुया दुने सम्बन्धित व्यक्तियात प्रत्याभूत जुइकथं नष्ट यायेमाःगु व्यवस्था विधेयकय् प्रस्तुत यानातःगु दु ।
विद्युतीय स्वरुपय् दुगु सुचंया कालबिल, प्रशोधन व संचय यायेबलय् प्रशोधनकर्ता, संचयकर्ता व सेवा प्रदायकं गोपनीयता व अक्षुण्णता कायम यायेगु विषययात विशेष ध्यान बीमाःगु जुइ । सरकारी सार्वजनिक, वित्तीय व स्वास्थ्यसम्बन्धी निकायं क्वःछिनातःगु विवरण अनिवार्य रुपय् कानूनकथं हे सुरक्षित तयेमाः । अज्याःगु सुचं देशं पिहां मवनीगु प्रत्याभूतिसहित सुरक्षित याना तयेमाः ।
सरकारी निकायं लाक्वपाक्व रुपय् कम्प्युटरया प्रयोग व सूचना प्रणालीया प्रयोग यायेबलय् हेलचक्र््याइँ याये मदइगु व्यवस्थायात तकं विधेयकं कडा प्रावधानसहित कःघानातःगु दु । अनुमति मकासे तथ्यांक केन्द्र व ‘क्लाउड’ सेवा संचालन याये मदइगु व्यवस्थातकं विधेयकय् यानातःगु दु । अज्याःगु केन्द्र दँय्दसं नवीकरण यायेमाः ।
विधेयकं साइबर सुरक्षाया विषययात तकं प्रमुख प्राथमिकताय् तःगु दु । सरकारं छुं नं राष्ट्रिय सुरक्षा, अर्थ व्यवस्था, अत्यावश्यक सेवा , आकस्मिक सेवा, स्वास्थ्य व सार्वजनिक सुरक्षाय् तकं गम्भिर लिच्वः लाके फइगु सूचना व संचार पूर्वाधारयात नेपाल राजपत्रय्् पिथनाः संवेदनशील पूर्वाधार क्वःछी फइ ।
LEAVE YOUR COMMENTS