मनपाया छात्रवृत्तिइ ध्यबा पुलेम्वाः

येँ (नेपालभाषा टाइम्स)- यँ महानगरपालिकापाखे ११ व १२ तगिमय् थुगु दँया निंतिं छात्रवृत्ति सिफारिस जूपिं विद्यार्थीतय्सं सम्बन्धित स्कुल व क्याम्पसय् गुगुं नं कथंया शुल्क पुलेम्वाःगु खँ स्पष्ट याःगु दु ।

गुलिखे विद्यालय व क्याम्पसय् आन्तरिक प्रयोग शाला व थीथी शीर्षकय् शुल्क काःगु व थाय् मदुगु कारण क्यनाः भर्ना कायेत आनाकानी याःगु गुनासोया सन्दर्भय् महानगरपालिकाया शिक्षा विभागं थ्व खँ स्पष्ट याःगु खः ।

विभागं वंगु भदौ १ गते पौ छ्वयाः तगिं ११ व १२ सञ्चालन यानाच्वंगु निजी (संस्थागत) विद्यालयया सञ्चालकयात सःताः गुगुं नं छात्रवृत्तिइ सिफारिस जूपिं विद्यार्थीयात भर्ना मकाल धाःसा, शुल्क काल धाःसा, मानसिक यातना बिल धाःसा कारबाही यायेगु जुइ धकाः ख्याच्वः नं बीधुंकूगु दु ।
छात्रवृत्ति सम्बन्धी गुनासो सम्बोधन जूगु व अझ छुं खँ दुसा महानगरपालिकाय् स्वापू तयेत नं इनाप याःगु दु ।

येँ मनपाया शिक्षा अधिकारी सीताराम कोइरालां वंगु साउन २० गते छात्रवृत्ति परीक्षाय् सम्मिलित जुयाः म्याचिङ प्रणालीपाखें लिपांगु योग्यताक्रमया आधारय् न्हापांगु भर्ना धलखय् लाःपिं विद्यार्थीयात भदौ ३ गते तक सम्बन्धित स्कुलय् भर्ना जुयाः जानकारी याकेत नं धयातःगु दु ।