मरुसतः पुनःनिर्माणया प्रतिवेदन लःल्हात
येँ(नेपालभाषा टाइम्स)- मरुसतः पुनःनिर्माणया प्रतिवेदन येँ महानगरपालिकायात लःल्हाःगु दु । काष्ठमण्डप पुनःनिर्माण समितिं मरुसतः पुनःनिर्माण क्वचाःगु प्रतिवेदन महानगरयात लःल्हाःगु खः । समितिया नायः राजेश शाक्यलिसें समितिया पदाधिकारीतय् छगू पुचलं येँ महानगरपालिकाया प्रमुख प्रशासकीय अधिकृत वसन्त अधिकारीयात उगु प्रतिवेदन लःल्हाःगु खः ।
प्रतिवेदन लःल्हासें समितिया नायः शाक्यं महालेखा परीक्षकं कुला बिउगु विषययात मध्यनजर यानाः आर्थिक विवरणसहितया प्रतिवेदन लःल्हानागु जानकारी बियादिल । लिसें वय्कलं मरुसतः पुनःनिर्माणय् महानरपालिकापाखें उपलब्ध याकूगु ११ गू करोड ५० गू लख दां खर्च जुइधुंकूगु व ज्या क्वचायेधुंकाः अझं ३६ गू लख भुक्तानी याये ल्यं दुगु नं कनादिल ।
महानगरं मरुसतःया ताःचा लःल्हाना कासें आः ल्यं दुगु भुक्तानीया प्रक्रिया न्ह्याकेत इनाप यासें समितिया नायः शाक्यं मरुसतःयात नियमित रुपं संचालन, संरक्षणलिसें सर्वसाधारणया निंतिं खुल्ला यायेत व मरुसतःया भौतिक रुपं जिम्मेवारी स्वीकार याना कायेत नं इनाप यानादिल ।
प्रमुख प्रशासकीय अधिकृत अधिकारीं आवश्यक दक्वं भ्वं व प्रतिवेदन अध्ययन लिपा जक ताःचा लःल्हाना कायेगु व वयां लिपा माःगु प्रक्रिया न्ह्यःने यंकेगु जुइ धयादिल ।
समितिं लःल्हाःगु प्रतिवेदन प्रमुख प्रशासकीय अधिकृत अधिकारीं महानगरया हे सम्पदा तथा पर्यटन विभाग प्रमुख अर्चना शाक्ययात अध्ययनया निंतिं लःल्हानादीगु खः । विभागपाखें प्रतिवेदन अध्ययन लिपा सम्पदा तथा पर्यटन समितिइ यंकाः सहलह याइगु व अनं लिपा प्रमुख, उपप्रमुखसहितया बैठकय् सहलह यानाः मरुसतः खुल्ला यायेगु विषयय् सहलह यानाः निर्णय याइगु जूगु दु ।
समितिं लःल्हाःगु प्रतिवेदनय् छुं खँय् स्पष्ट जुइमाःगु आवश्यक जुल धाःसा सहलहया निंतिं समितियात सःते फइगु व आवश्यक मेमेगु भ्वं नं माग याये फइगु प्रमुख प्रशासकीय अधिकृत अधिकारीं धयादीगु दु ।
२०७२ बैशाख १२ गतेया विनाशकारी तःभुखाचं मरुसतः पाःताः जुइक दुंगु खः । वयां लिपा येँ देय्या म्हसीकाया रुपय् धस्वानाच्वंगु मरुसतः पुनःनिर्माणया निंतिं २०७५ बैशाख १८ गते तत्कालीन जनप्रतिनिधि, स्थानीय व सरोकारवालातय् मुँज्यां तत्कालीन बागमति प्रदेशसभा सदस्य शाक्यया अध्यक्षताय् काष्ठमण्डप पुनःनिर्माण समिति गठन याःगु खः । समिति गठनलिपा २०७५ जेठ २४ गते नगर कार्यपालिकाया बैठकं उपभोक्ता समितिपाखें मरुसतः पुनःनिर्माण यायेगु व उकिया खर्च येँ महानगरपालिकां यायेगु निर्णय यानाः वयां प्यन्हु लिपा येँ महानगर व समिति दथुइ छगू सम्झौता याःगु खः । सम्झौता जूगु हे दिं समितियात पुनःनिर्माणया ज्या न्ह्याकेत धासें महानगरं ५० लू लख तका दां नं उपलब्ध याकूगु खः ।
भुखाचं क्षति जुइ न्ह्यःया हे शैली व स्वरुपय् पुनःनिर्माण जूगु मरुसतः २०७८ चैत २१ गते तत्कालीन राष्ट्रपति विद्यादेवी भण्डारीं पुनःनिर्माण सम्पन्न जूगु ल्वहंपौ अनावरण यानाः उलेज्या यानादीगु खः । उगु इलय् समितिया नायः शाक्यं येँ महानगरया तत्कालीन प्रमुख विद्यासुन्दर शाक्ययात मरुसतःया ताःचा लःल्हानादीगु खःसा वयां लिपा प्रमुख शाक्यं राष्ट्रपति भण्डारीयात लःल्हानादीगु खः ।
समितिं महानगरयात लःल्हाःगु प्रतिवेदनय् पुनःनिर्माणलिसे सम्बन्धित सहमति, नक्सा, प्राविधिक मूल्यांकन, आर्थिक विवरणत दुथ्यानाच्वंगु दु । निगू खण्ड दुगु प्रतिवेदनया खण्ड ‘क’य् समिति गठन, समिति गठनया पृष्ठभूमि, अवधारणा, पुनःनिर्माण सम्बन्धी सांगठनिक संरचना, कार्य संचालन विधि आदि दुथ्यानाच्वंगु दुसा खण्ड ‘ख’य् पुनःनिर्माण शुरु जूगु आर्थिक दँ २०७४÷०७५ निसें निर्माण सम्पन्न जूगु आर्थिक दँ २०७९÷०८० तकया लेखापरीक्षण प्रतिवेदन, पुरातत्व विभागपाखें स्वीकृत नक्सा, स्ट्रक्चरल एनालाइसिस प्रतिवेदन, पुनःनिर्माणया क्रमय् तयार यानातःगु नक्सा लगायतया भ्वँ दुथ्याकातःगु दु ।
अथे हे मसरुतःया थां धस्वाकेगु, आँय्पा छीगु, मुख्य सामग्री विवरण, पुजा, अनुष्ठानया सूची, बाह्य व थीथी थासं जूगु अवलोकन भ्रमण व प्राविधिक प्रतिवेदन नं दुथ्याकातःगु दु ।
LEAVE YOUR COMMENTS