आनन्द भुवनया निक्वःगु दँमुँज्या व न्हूगु ज्यासना पुचःया ल्यज्या

येँ – स्वयम्भू धिमेल्वहंतय् च्वंगु आनन्द भुवन विहारया निक्वःगु दँमुँज्या वंगु शनिवाः जुल । विहार प्रमुख श्रद्धेय भिक्षु समितया सभापतित्वय् जूगु दँमुँज्याय् अखिल नेपाल भिक्ष महासंघया न्वकु श्रद्धेय भिक्षु धम्ममूर्ति महास्थविरया मूपाहांकथं बिज्याःगु खः ।

विहार समितिया न्वकु विद्यासागर तुलाधरं लसकुस यानादीगु ज्याझ्वलय् मूछ्यांजे बृद्धिमान शाक्यं विहारया वार्षिक प्रगति विवरण नापं विहार याःगु थीथी ज्याझ्वःया बारे जानकारी बियादीगु खःसा दांभरिं महेन्द्र वज्राचार्यं ल्याःचाः न्ह्यब्वयादीगु खः । दँमुँज्याया निगूगू चरणय् न्हूगु ज्यासना पुचःया नं ल्यज्या याःगु खः ।

ल्यज्याया निंतिं डा. त्रिरत्न मानन्धरया संयोजकत्वय् चुनाव कमिटी गठन यानाः न्हूगु ज्यासना पुचःया ल्यज्या याःगु खःसा निर्वाचित जुयादीपिनिगु नां नं वय्कलं घोषणा यानादीगु खः ।

न्हूगु ज्यासना पुचलय् श्रद्धेय भिक्षु शान्त सिद्धार्थ अध्यक्ष, विद्यासागर तुलाधर उपाध्यक्ष, बृद्धिमान शाक्य मूछ्यांजे, रविन्द्ररत्न तुलाधर लिउ छ्यांजे, महेन्द्र वज्राचार्य दांभरिं व विजयरत्न तुलाधर लिउ दांभरिंलय् निर्वाचित जुयादीगु खः । थुकिया नापं मेपिं झिम्ह दुजःपिं नं ज्यासना पुचलय् निर्वाचित जुयादीगु खः ।

निर्वाचित जुयादीपिं सकसितं मूपाहां भिक्षु धम्ममूर्ति महास्थविरं खादां क्वखायेकाः बिज्यासे न्हूगु ज्यासना पुचःया कार्यकाल सुथां लायेमा धकाः भिंतुना देछासे ओवाद नं बियाबिज्याःगु खः ।

सम्बन्धित बुखँ

LEAVE YOUR COMMENTS