प्यक्वःगु अन्तर कंकेश्वरी कराते कासा क्वचाल

येँ – नेपाल एकायन कराते संघ, कंकेश्वरी शाखाका ग्वसालय् असोज ६ गते शनिवाः कुन्हु येँ वडा नंं. १९, मरुहितिइ च्वंगु शान्ति निकुञ्ज मा. वि. या ख्यलय् प्यक्वःगु कंकेश्वरी अन्तरविद्यालय एकायन कराते कासा जुल । येँ महानगरपालिकाया उपमेयर मय्जु हरिप्रभा खड्गी श्रेष्ठया मू पाहांकथं झायादी उगु कासाय् येँया थीथी विद्यालयया मुक्कं १२० म्ह कासामिपिंसं ब्वति काःगु खः ।

उगु कासाय् मिसा व मिजंतय्गु थीथी इभेन्टय् कासा न्ह्याःगु खः । मिजंपाखे २५ केजी क्वय्या तौल समूहय् अनिज क्षेत्री, न्हूसः मानन्धर व भावुक सेढाई छसिकथं न्हाप, लिउ व लियांलिउ लाःगु खः । ३० केजी क्वय्या तौल समूहय् एलिश राई न्हाप, रिजन पौडेल लिउ व कृष्ण भुषाल लियांलिउ लाःगु खः । अथेहे ३५ केजी क्वय् तौल समूहय् सोम घले न्हापा लाःगु खःसा शिबु पटेल लिउ व दिछाल मगर लियांलिउ लाःगु खः ।

मेमेगु प्रतिस्पर्धा मध्ये ४० केजी क्वय्या समूहय् सन्जित धिताल, सन्नी घिसिंग व अनिष भुषाल न्हाप, लिउ व लियांलिउ लाःगु खःसा ५० केजी क्वय्या तौल समूहय् न्हापा सजीन महर्जन, लिउ मुस्कान पुन मगर व सांगे शेर्पा लियांलिउ लाःगु खः । अथेहे मिजंपाखे ५५ केजी तौल अन्तर्गतया कासाय् जयमान तामाङ्ग न्हाप लाना पदक प्राप्त यायेत ताःलाःगु खःसा, विशाल थापां रजत पदक जनिप परियारं कास्य प्राप्त याःगु खः ।

मिजंतय्गु लिपांगु स्पर्धा अन्तर्गत जूगु ५५ केजी च्वय्या कासाय् विजय तामाङ्ग न्हापा, सुसन श्रेष्ठ लिउ व गौरव घले लियांलिउ लाःगु खः ।मिस्सातय्गु ३० केजी क्वय्, ४५ केजी क्वय् व ४५ केजी च्वय् यानाः मुक्कं स्वंगू समूहय् स्पर्धा जूगु खः । गुकी ३० केजी क्वय्या तौल समूहय् आकृती राया क्षेत्रीं न्हाप लाकाः स्वर्ण पदक त्याकूगु खःसा परिषा खड्का व युनिषा राउटं छसिकथं रजत व कास्य पदक त्याकल ।

अथेहे ४५ केजी क्वय्या तौल समूहय् मनिषा घले न्हापा, सल्मा खातुन लिउ व सोनम तामाङ्ग लियां लिउ लाःगु खः । मिसातय्गु लिपांगु स्पर्धा अन्तर्गत ४५ केजी च्वय्या तौल समूहय् प्रकृति स्थापित न्हापा व निर्जला महर्जन लिउ लाःगु खः ।कासा विजयी जूपिंत नेपाल एकायन कराते संघ येँ जिल्ला समितिया सल्लाहकारपिं आनन्द बहादुर शाही, मिलन शाही व ज्याझ्वःया संयोजक प्रतिक खड्गीं ट्रफि, मेडल व दसि पौ लःल्हानादीगु खः ।

कासाया निर्णायकमण्डलय् सिर्जन अधिकारी च्वनादीगु खःसा मुख्य निर्णायकय् भरत धौलाकोटी व सहायक निर्णायकय् कशोर पाख्रिन, निखिल बोगटी, रुपेश मगर व अन्सुमन चौधरीं लगायत च्वनादीगु खः ।