सद्भाव कायम यायेत गुंगू राजनीतिक दलतय् अपील
येँ (नेपालभाषा टाइम्स) – सुनसरीइ जूगु घटना लिपा राजनीतिक दलतय्सं शान्ति व सद्भावया निंतिं मंकाः अपिल जारी याःगु दु । राष्ट्रिय स्वतन्त्र पार्टी (रास्वपा) या सभापति रवि लामिछाने सःतूगु सवंदलीय बैठक लिपा गुंगू दलया प्रमुख व प्रतिनिधिपिंसं न्हय्गू बुँदे अपिल जारी याःगु खः । मंकाः अपिलय् राष्ट्रिय एकता व सामाजिक सद्भावया रक्षाया निंतिं फुक्कं दल छप्पँ दुगु सन्देशसहित ब्वलंगु समस्याया दिगो, प्रभावकारी लिसे शान्तिपूर्ण समाधानया निंतिं सरकार व समाजयात फयांफछि ग्वाहालि यायेत तयार दुगु संकल्प नं याःगु दु ।
मंकाः अपिलय् धयातःगु दु, ‘सलंसः दँनिसें झीगु समाजय् कायम जुयाच्वंगु पारस्पारिक भाइचारा व सामाजिक सद्भावयात स्यंकेगु गुगुं नं कथंया अवाञ्छित गतिविधि व उत्तेजनाय् मवयेत जिमिसं सकलें देशवासी व आम नागरिकतय्त हार्दिक अपिल यानाच्वना । आवेग व मुठभेडं समस्या समाधान मजुसें थप जटिलता जक ब्वलंकीगु यथार्थप्रति झी सकलें सचेत जुइमाःगु दु ।’
प्रदेश, जिल्ला व स्थानीय तहलय् तत्काल सर्वदलीय व सर्वपक्षीय बैठक तयेत, संवादयात क्वय्या तहलय् थ्यंकेत व नागरिकस्तरय् विश्वासया वातावरण दयेकेत पार्टीया क्वय्या कमिटीतय्त निर्देशन नं बिउगु दु । स्थानीय स्तरय् धार्मिक न्ह्यलुवाः, नागरिक समाज व स्थानीय प्रशासन लिसे जानाः शान्ति कायम यायेत सक्रिय जुइत नं अपिलय् इनाप यानातःगु दु । उकथं हे अपिलय् संवेदनशील इलय् सामाजिक सञ्जाल जिम्मेवारी जुयाः छ्यलेत नं नागरिकतय्त इनाप यासें सञ्चारमाध्यमयात सयंमित व तथ्यपरक सुचं सम्प्रेषण यायेत इनाप नं याःदु । नागरिकया जीउधनया रक्षा यायेगु राज्यया दायित्व जूगुलिं संयमता नालाः परिस्थितियात सामान्यीकरण यायेत, घटनाया निष्पक्ष छानबिन यानाः दोषीयात कानुन कथं कारबाही यायेत व पीडित पक्षयात उचित क्षतिपूर्ति लिसे राहत बीत सरकारया ध्यानाकर्षण नं याकूगु दु ।
सुनसरी घटनायात कयाः सरकारं सर्वदलीय बैठक सःतेमाःगु खःसां नं मसःतूगु खँयात कयाः प्रधानमन्त्री बालेन शाहया आलोचना जुयाच्वंगु दु । उकथं हे म्हिगः च्वंगु सर्वदलीय बैठकय् गृहमन्त्री सुधन गुरुङं नं ब्वति मकाःगु खँय् सामाजिक सञ्जालय् आलोचना जुयाच्वंगु दु । सरकारं सःतेमाःगु सर्वदलीय बैठक सःतेगु ज्याय् न्ह्यचिउम्ह रास्वपाया सभापति लामिछानेयात धाःसा फुक्कं धयाथें राजनीतिक पार्टीतय्सं तारिफ याःगु दु ।
LEAVE YOUR COMMENTS