ने. सं. ११४६ दिल्लागा पारू -

जापानय् भुखाय् ब्वयाः १३ म्हसित, उद्धारकार्य जारी

एजेन्सी – जापानया दक्षिणपश्चिमय् च्वंगु क्युसुइ टापुया कुमामोतो प्रान्तय् मंगलवाः शक्तिशाली भुखाय् ब्वयाः म्हिगः बहनी तकया दुने १३ म्ह सीगु व २४ म्हं मल्याक मनूत घाःपाः जूगु पुष्टि जूगु दु । भुखाय् ब्वयाः सपिङ मल, औद्योगिक प्रतिष्ठान, सतक, ताँलिसें थीथी ऐतिहासिक संरचनाय् तःधंगु क्षति जूगु दु । द्वलंद्वः छेँय् मतया आपूर्ति बन्द जुयाच्वंगु दु । जापानया प्रधानमन्त्री सोन ताकाचीं उद्धार कार्य जारी जुयाच्वंगु जानकारी बिउगु दु ।

कुमातोतो प्रान्तय् स्थानीय ईकथं मंगलवाः न्हिने सिया ४ः२७ ता इलय् तःभुखाय् ब्वःगु खः । अमेरिकाया भूभर्ग सर्वेक्षणं ६.८ म्याग्निच्युडया भुखाय् ब्वःगु धाःगु दुसा जापानी अधिकारीतय्सं थुकियात ७.१ म्याग्निच्युड धाःगु दु । जापानय् ब्वःगु भुखाय्या कारणं कासिमा शहरय् च्वंगु छगू सपिङ मलय् दकलय् अप्वः क्षति जूगु खः । सरकारी स्रोतं बिउगु जानकारी कथं भुखाय् लिपा मलय् च्वंगु ग्यास विस्फोट जुयाः कःसि व पःखाः दुनावंगु खः । मल सञ्चालक कम्पनी एओनं मलं कर्मचारी व ग्राहकतय्त सुरक्षित लिकाये धुंकाः विस्फोट जूगु धाःगु दु । स्थानीय प्रशासन बिउगु जानकारी कथं मलय् च्याम्ह मनूतय्गु उद्धार जूगु दु । उकी मध्ये न्याम्ह घाःपाः जूगु दु ।

बीबीसीया कथं थ्व मलय् २०४ स्टोर व २७०० म्ह कर्मचारी दुगु खः । भुखाय्या कारणं कुमामोतो च्वंगु होन्डा कम्पनी नं क्षति जूगु दु । कम्पनी शुक्रवाः तक बन्द जुइगु जानकारी बिउगु दु । यात्सुशिरो च्वंगु निप्पोप पेपर इन्डस्ट्रिजय् नं क्षति जूगु व उगु थासय् ज्या यानाच्वपिं गुम्ह बेपत्ता जुयाच्वंगु दु । बुधवाः सुथय् तक कुमामातोया ३८ द्वलं मल्याकं छेँय् मतया आपूर्ति जूगु मदुनि । जापानी र क्षामन्त्रालयं विपद् व्यवस्थापन व उद्धार कार्यया निंतिं ३६०० सैनिक परिचालन याःगु दु । क्षतिया हवाइ मुल्याकंन यायेगु निंतिं २० गः सैन्य विमान नं परिचालन याःगु दु ।