सुनसरी घटना : प्रधानमन्त्रीया भूमिकायात कयाः न्ह्यसः
येँ (नेपालभाषा टाइम्स) ( सुनसरी जिल्लाय् ब्वलंगु घटनायात कयाः राष्ट्रिय स्वतन्त्र पार्टी (रास्वपा) या सभापति रवि लामिछाने सःतूगु सर्वदलीय बैठकय् प्रधानमन्त्री बालेन साह व गृहमन्त्री सुधन गुरुङया भूमिकायात कयाः आलोचना जूगु दु ।
म्हिगःया सर्वदलीय बैठकय् नेपाली कांग्रेसया सभापति गगन थापां संवेदनशील विषयय् प्रधानमन्त्री शाहं पाखे अपेक्षित प्रतिक्रिया मवःगु चिन्ताया विषय जूगु खँ धयादीगु दु । वय्कलं प्रधानमन्त्री सरकार प्रमुख जूगु कारणं सम्बन्धित निकायलिसे तत्काल समन्वय व पहल यायेमाःगु खँ धयादीगु खः ।
उकथं हे एमालेया महासचिव शंकर पोखरेलं थुलि महत्वपूर्ण विषयय् सम्वादया कुतः राजनीतिक दलं स्वयां सरकारं हे यायेमाःगु खँ धयादीगु दु ।
अथे हे नेपाली कम्युनिष्ट पार्टीया संयोजक पुष्पकमल दाहालं सुनसरी घटनायात ज्यंकेगु मू जिम्मेवारी सरकारया हे जूगुलिं थुकियात प्रधानमन्त्रीं गम्भीरतापूर्वक कायेमाःगु खँ धयादीगु दु । वय्कलं प्रधानमन्त्री शाहं सार्वजनिक रूपय् थःम्हं पहल मयाःगु अजूचायापूगु विषय जूगु धासें धयादिल, ‘जिं प्रधानमन्त्री जुयाच्वनागु इलय् राष्ट्रिय मुद्दा, विपद् व्यवस्थापन लिसें संवैधानिक विषययात कयाः सर्वदलीय संवादया कुतःया लिसें सहमति दयेकेगु ज्या जूगु खः ।’
उकथं हे राप्रपाया अध्यक्ष राजेन्द्र लिङ्देन संवादया कुतः सरकारं यायेमाःगु खँ धासें थज्याःगु बैठकय् म्होतिं नं गृहमन्त्रीया उपस्थिति जुइमाःगु खँ धयादीगु दु ।
उकथं लोकतान्त्रिक समाजवादी पार्टीया अध्यक्ष महन्त ठाकुरं मधेशी प्रधानमन्त्री जूसां नं प्रभावकारी सरकारी पहलया अभाव जूगु खँ धयादीगु दु । वय्कलं प्रधानमन्त्री प्रहरी बल छ्यलाः गुगुं छगू विशेष समुदाययात असमान रूपय् स्वःगु खःसा थ्व गम्भीर चिउताःया विषय जूगु खँ धयादीगु दु ।
थ्वहे झ्वलय् सुनसरीया घटनायात कयाः सुरक्षा विश्लेषण यायेगु झ्वलय् सुरक्षा निकायं गृहमन्त्री गुरुङयात थुकियात राजनीतिक रुपं ज्यंकेमाःगु सुझाव बिउगु दु । म्हीग गृह मन्त्रालयय् सुरक्षा निकायया प्रमुखपिं व गृहमन्त्री गुरुङ व गृहसचिव राजकुमार श्रेष्ठ दथुइ जूगु सहलहया झ्वलय् प्रहरीया ल्याः अप्वयेका समस्या समाधान जुइगु सम्भावना मदुगु धासें राजनीतिक रुपं समस्या ज्यंकेमाःगु सुझाव बिउगु खँ सुरक्षा सूत्रं धाःगु दु । म्हीगया बैठकय् गृहमन्त्री गुरुङं थःपिनिगु खँ तयेगु स्वयां नं सुरक्षा निकायया खँय् अप्वः ध्यान बिउगु खँ धाःगु दु ।
सुरक्षा निकायं आःया समस्या सुरक्षाया दृष्टिकोणं जक मखुसें राजनीतिक, सामाजिक व धार्मिक कोणं नं स्वयेमाःगु सुझाव बिउगु खः । सुझाव बीगु झ्वलय् सुरक्षा निकायं भीड नियन्त्रण यायेत थप सुरक्षाकर्मी छ्यलेगु खःसा थुकिं अःखः लिच्वः वयेफइगु धासें थप प्रहरी बल छ्यले मजिउगु सुझाव बिउगु खः । उगु सुझाव लिपा हे रास्वपाया सभापति लामिछानेया सर्वदलीय बैठक सःतूगु खः ।
LEAVE YOUR COMMENTS