सुशासन व एकीकृत विकास याये

छिगु एजेन्डा छु खः ?
भ्रष्टाचार मुक्त यानाः आर्थिक पारदर्शीता कायम यायेगु, अनियमितता व पदीय दुरुपयोग रोके यानाः वडाया प्रशासनिक ज्याय् सुशासन कायम यायेगु । वडाय् विकेन्द्रीकृत एकीकृत विकास योजना नापं लः, धः, फोहरया समुचित व्यवस्थापन यायेगु, सुलभ स्वास्थ्य सेवा उपलब्ध याकेगु ।

वडाय् दुुगु मुख्य समस्यात छु छु खः ?
न्हापां ला फोहर व्यवस्थापन हे खः। उकिया नापं दुनेया वस्तीइ लःया समस्या नं उतिकं दु । अथेहे बेरोजगारीया समस्या, भौतिक सम्पदाया उचित संरक्षण, मर्मत, जिर्णोद्वार यायेमाःगु नं आवश्यक दु ।

छि निर्वाचित जुयादी धइगु आधार छु दु ?
कांगे्रसं वडाया विकासया निंतिं थःगु हे पहलय् ज्या यानाच्वंगु दु । वडावासीया समर्थन नं गाक्कं दु । वडावासीं परिवर्तनया चाहना यानाच्वंगु दु । वडावासीया समर्थन व इमिगु परिवर्तनया चाहना हे विजयया मुख्य आधार खः ।

निर्वाचित जुया वयेधुंकाः न्हापां छु यानादी ?
नागरिक बडापत्र जारी यायेगु नापं विकासया योजना तयार यानाः कार्यान्वयन याये । वडावासीयात बीगु सेवा अनलाइनपाखें याये । वडाय् सुरक्षा प्रबन्ध यायेगु नापं अव्यवस्थित जुयाच्वंगु फुटपाथ पसःयात व्यवस्थित याये ।

भाषा, कला, संस्कृतिया निंतिं छिगु योजना छु दु ?
भाषाया सम्बन्धय् वडाया ज्या व निवदेन नेपालभाषां कायेगु व्यवस्था याये । सामुदायिक स्कुलय् नेपालभाषाया कक्षा प्रभावकारी रुपं संचालन यायेगु । निजी स्कुलय् नं अनिवार्य ब्वंकेगु व्यवस्था यायेत पहल याये । मौलिक परम्परागत कला, प्याखंया संरक्षणया निंतिं तालिमया व्यवस्था यायेगु नापं कला, संस्कृतिया संरक्षणया निंतिं प्राथमिकता बियाः न्ह्याः वने ।

सम्बन्धित बुखँ

LEAVE YOUR COMMENTS