चित्तरन्जन नेपालीयात लुमंकल

येँ (नेपालभाषा टाइम्स)÷ नेपालभाषा एकेदेमिया पुलांम्ह चान्सलर व न्हूदँ नेपाल सम्बत राष्ट्रिय समारोह समितिया पुलांम्ह नायः चित्तरन्जन नेपालीयात लुमंकाः शनिवार छगू लुमन्ति मुँज्या जूगु दु ।

नेपालभाषा साहित्यख्यलय् ज्वःमदुगु योगदान दुम्ह साहित्यकार, अन्वेषक, समालोचक चित्तरन्जन लुमन्ति सभा एकेदेमिया चान्सलर यज्ञरत्न धाख्वाःया सभापतित्वय् जूगु खः । ज्याझ्वलय् ब्वति कयादीपिं सकसिनं दिवंगत नेपालीया सुगतिया कामना यासें वय्कःया किपा न्ह्यःने देवा छप्वाः छप्वाः च्याकादीगु खः । अथेहे वय्कःया आत्माया चिरशान्ति कामना यासें थीथी धार्मिक परम्परा कथं पाठ नं याःगु खः ।

ज्याझ्वलय् न्हूदँ समारोह समितिया सल्लाहकार व एकेदेमिया दुजः प्रा. प्रेमशान्ति तुलाधर, एकेदमिया पुलांम्ह दुजः समालोचक प्रा डा चन्द्रमान बज्राचार्य, मदुम्ह चित्तरन्जनया काय् मनोज राजभण्डारी, परिवारया मेम्ह दुजः मन्जुर राजभण्डारी व नेपालभाषा एकेडेमीया भाइस चान्सलर नेवाः न्ह्यलुवा मल्ल के सुन्दरं चित्तरन्जन नेपालीया गुण लुमंकादीगु खः ।

एकेदेमिया प्राज्ञ दुजः विजयरत्न असंबरें न्ह्याकादीगु ज्याझ्वलय् न्हूदँ राष्ट्रिय समारोह समितिया सचिवालय दुजः सुजिव बज्राचार्यं सुभाय् देछायादीगु खः ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल