चुनावयात कयाः राष्ट्रपतिया चिउताः

येँ- राष्ट्रपति विद्यादेवी भण्डारीं संविधानय् व्यवस्था यानातः थें स्थानीय तहया चुनाव इलय् हे यायेत प्रधानमन्त्री शेरबहादुर देउवायात इनाप यानादीगु दु । प्रधानमन्त्री देउवां म्हिगः राष्ट्रपतियात नापलानाः खँल्हाबल्हा याःगु इलय् राष्ट्रपतिं थ्व इनाप यानादीगु खः ।

राष्ट्रपतियात नियमित ज्याझ्वः कथं नापलायेत प्रम देउवा म्हिगः शितल निवास झाःगु खः । उगु इलय् राष्ट्रपति भण्डारीं संविधानया मर्म व भावना कथं इलय् हे स्थानीय तहया निर्वाचन व मेगु निर्वाचन नं सम्पन्न यानाः संविधानयात पूर्ण कार्यान्वयन यायेमाःगु खँय् बः बियादीगु खः ।

लिसलय् प्रधानमन्त्री देउवां स्थानीय निर्वाचन बारे फुक्कं दलतलिसे परामर्श जुयाच्वंगु जानकारी बिसें थुकी राष्ट्रपतिं क्यनादीगु सरोकारया बारे पासापिंलिसे खँ ल्हाये धयादीगु खँ सूत्रं धाःगु दु । सूत्रया कथं उगु इलय् प्रम देउवां संविधानया कार्यान्वयनय् सरकार प्रतिबद्ध दुगु खँ कँसें संविधानया मर्म व भावना कथं इलय् हे निर्वाचन जुइ व थुकिया लागिं फुक्कसिके सल्लाह यानाः निष्कर्षय् थ्यंके धकाः लिसः बियादीगु खः ।
राष्ट्रपति भण्डारी व प्रधानमन्त्री देउवाया दथुइ वंगु बुधवाः जूगु राष्ट्रियसभाया निर्वाचन, संसदय् प्रतिपक्षी एमालेपाखें यानाच्वंगु पंगः लिसें समसामयिक राजनीतिक गतिविधियात कयाः सहलह जूगु खँ राष्ट्रपति कार्यालयं धाःगु दु । वय्कःपिं निम्हेसिया दथुइ करिब घौछि खँल्हाबल्हा जूगु खँ नं राष्ट्रपति कार्यालयं धाःगु दु ।

प्रमुख प्रतिपक्षी दल नेकपा एमालें निरन्तर रुपं संसदय् पंगः थनाच्वंगु खँय् नं निम्हसिया दथुइ सहलह जूगु खँ धाःगु दु । सूत्रया कथं संसदय् ब्वलनाच्वंगु पंगः चीकेगु निंतिं राष्ट्रपति भण्डारीयात समन्वय यायेत प्रम देउवां इनाप यानादीगु खः ।

स्थानीय तहया चुनाव यायेगु खःसा उकिया मिति घोषणा आः हे यायेमाः धकाः निर्वाचन आयोगं धयाच्वंसां सरकार धाःसा कानुन संशोधन यानाः जूसां चुनाव लिछ्यायेगु मनस्थितिइ वनाच्वंगु दु । तर प्रमुख प्रतिपक्षी एमालें कानुन संशोधन नं मयाकेगु रणनीति ज्वंगु जुयाः सरकारं अध्यादेश हयाः जूसां कानुन संशोधनया तयारी यानाच्वंगु खँ पिहां वःगु दु । यदि अध्यादेश हये माःगु अवस्था वल धाःसा उकी राष्ट्रपतिया नं भूमिका दइगु जुयाः प्रधानमन्त्रीं राष्ट्रपतियात नापलाःगु जुइमाः धकाः नं राजनीतिक वृत्तय् चर्चा जुयाच्वंगु दु । अध्यादेश बारे खँ जू मजू धइगु बारे धाःसा छुं खँ पिहां वःगु मदुनि ।

संसद सचिवालयय् धाःसा कर्मचारीतय्सं आः चालु संसद अधिवेशन अन्त्य यानाः सरकार अध्यादेशया लँपुइ हे वनीगु जुइ धकाः उकिया तयारी समेत शुरु यायेधुंकूगु खँ सीदुगु दु । प्रमुख प्रतिपक्षी एमालें संसद चले याके मबियाच्वंगु कारणं आः थ्व संसद भंग यानाः अध्यादेश मार्फत माःगु ऐनत हयाः ज्या याना वनेगु धइगु मनस्थितिइ सरकार थ्यंगु संकेत वःगु दु । उकिं आः सरकारं संसदया चालु अधिवेशन याकनं क्वचायेकीगु जुइमाः धइगु अनुमान यासें कर्मचारीतय्सं संसद अन्त्य जुइबलय् याइगु ज्याखँत शुरु यायेधुंकूगु खँ सूत्रं धाःगु दु ।