एल क्लासिको बराबरीइ

थुगु सिजनया अन्तिम एल–क्लासिको कासा बराबरीइ क्वचाःगु दु । शनिवाः चान्हय् जूगु परम्परागत प्रतिद्वन्द्वी बार्सिलोना व रियल म्याड्रिड दथुया कासा निगू निगू गोलया बराबरीइ क्वचाःगु खः । बार्सिलोना व रियल म्याड्रिड दथुया कासायात एल क्लासिको कासा धाइगु खः ।

गारेथ बेलं कासाया ७२ औं मिनेटय् याःगु गोलया ग्वाहालिं रियल कासा बराबरी यायेत ताःलाःगु खः । थ्वयां न्ह्य हे ला लिगा त्याकेधुंकूगु बार्सायात कासाया झिगू मिनेटय् हे लुइस स्वारेजं न्हापांगु गोल यासें अग्रता बिउगु खः । तर थ्वयां प्यगू मिनेट लिपा हे रोनाल्डों गोल यानाः कासा बराबरी जुल । थ्व धुंकाः न्हापांगु हाफया अतिरिक्त इलय् बार्साया सेर्गी रोबर्टयात ह्याउँगु कार्ड नकेवं लिपांगु ४५ मिनेट बार्सा झिम्ह जक कासामि ज्वनाः म्हितेमाःगु खः ।

अथे खःसां कासाया ५२ औं मिनेटय् मेस्सीं हाकनं छक्वः वार्सायात अग्रता बिउगु । बेलं कासा क्वचायेत १८ मिनेट ल्यं दनिबलय् बराबरी गोल यायेधुंकाः निगुलिं टिमं गोल यायेमफुत । थ्वयां न्ह्यः थःगु घरेलु मैदान बेर्नाबाउय् जूगु कासाय् रियलं बार्सापाखें ३–० गोलं पराजय फयेमाःगु खः । थुकिया बदला कायेत मैदानय् कुहां वःसां रियलं धासा कासा न्ह्याकेमफुत ।