भार प्रविधीया ग्वाहालि फ्रान्सया विजयी सुरुवात
येँ– विश्वकप अन्तर्गत शनिवाः फ्रान्स व अस्ट्रेलिया दथुइ जूगु कासाय् भिडियो असिस्टेन्ट रेफ्री (भार) प्रविधिया कारणं फ्रान्सं विजयी सुरुवात याःगु दु । थुगु विश्वकप निसें सुरु याःगु भार प्रविधि शनिवाः फ्रान्स व अस्ट्रेलिया दथुइ जूगु कासाय् न्हापांखुसी छ्यःगु खः ।
कासाया ५८ औं मिनेटय् फ्रान्सया एन्टोइन ग्रिजम्यानं पेनाल्टि मार्फत याःगु गोल भार प्रविधिया कारणं हे सम्भव जूगु खः । ग्रिजम्यानयात फल तःगु खःकि मखु धयागु भार प्रविधि पाखें स्वयेधुंकाः पेनाल्टिया ह्वःताः बिउगु खः ।
अथेहे कासाया ८० औं मिनेटय् पाउलो पोग्बां याःगु गोलयात नं भार प्रविधि पाखें हे स्वयाः गोल माने याःगु खः । पोग्बां थ्वाःगु बल गोलपोस्टय् च्वय्या बारय् न्यानाः गोल लाइनं दुहां वनाः पिहां वःगु खः । थ्व बलं गोल लाइन पार याः कि मयाः स्वयेत गोललाइन प्रविधिं निर्णय याःगु खः । पोग्बां थ्वाःगु बल छकूचां जक गोललाइन पार याःगु खः । थ्व हे गोलया ग्वाहालिं फ्रान्सं विश्वकपय् थःगु विजयी सुरुवात याःगु खः ।
समूह सी अन्तर्गत जूगु कासाय् फ्रान्सं अस्ट्रेलियायात २–१ गोलं बुकूगु खः । न्हापांगु हाफ गोलरहित बराबरीइ क्वचाःगु कासाय् फ्रान्सया निंतिं कासाया ५८ औं मिनेटय् ग्रिजम्यानं पेनाल्टिपाखें न्हापांगु गोल याःगु खः । थ्वयां ४ मिनेट लिपा हे अस्ट्रेलियाया मिले जेडिनकं पेनाल्टिपाखें हे गोल याःगु खः । सामुएल उम्टिटीं बक्स दुने ह्याण्ड यायेवं अस्ट्रेलियायात पेनाल्टि थ्वायेगु ह्वःताः बिउगु खः ।
LEAVE YOUR COMMENTS