युरोकपया न्हापांगु गोल आत्मघाती, इटली ३ गाेलं त्यात

येँ“– युरो कप २०२१ या न्हापांगु गोल हे आत्मघाती गोल जूगु दु । वंगु चान्हय् इटली व टर्कि दथुइ जूगु उद्घाटन कासाय् हे टर्किपाखे आत्मघाती गोल जूगु खः । कासाया ५३ औं मिनेटय् इटलीया डोमेनिको बेरार्डिया क्रस टर्किया मेरिह डेमिरलया म्हय् लानाः पोस्टय् दुहां वंगु खः ।

रोमय् जूगु थुगुसीया युरो कपया न्हापांगु कासाया न्हापांगु हाफय् निगुलिं टिमं गोल यायेमफुगु खःसा निगूगु हाफय् इटलीं स्वंगू गोल यासें कासा ३–० गोलं त्याकूगु खः । इटलीया निंतिं मेगु छगू गोल कासाया ६६ औं मिनेट सिरो इमोबिलें यात । ब्ररार्डिंया क्रसय् लियोनार्डो स्पिनाजोलां थ्वाःगु बल टर्किया गोलकिपर युग्ररकान काकिरं पंगु खःसां रिबाउन्डय् वःगु बलयात इम्मोबिलें पोष्टय् दुछ्वयाबिउगु खः ।

कासाया मेगु गोल लारेन्जो इन्साइनं कासाया ७८ औं मिनेटय् यात । टर्किया गोलकिपर काकिरया मिस पासयात लब कासें इटलीं थ्व गोल याःगु खः । गोलकिपर काकिरं सप्लाइ याःगु बल इटलीया कासामिं लानाकाःगु खःसा स्वंगू पासय् इन्साइनं सुन्दर गोल याःगु खः ।
युरोप कपया मेगु कासा थौं ६ः४५ य् वेल्स व स्विट्जरल्यान्ड दथुइ व ९ः४५ य् डेनमार्क व फिनल्यान्ड दथुइ जुइ ।