कांग्रेसया ढुलमुलेपन
प्रधानमन्त्री केपी शर्मा ओली विरुद्ध थीथी राजनीतिक पार्टीलिसें नागरिक समाज आन्दोलन कुहां वयाच्वंगु दु। सरकारं याइगु छुं नं कथंया अराजनीतिक गतिविधियात कयाः आन्दोलन जुइगु स्वाभाविक खः । तर स्वयम प्रधानमन्त्रीया पार्टी हे प्रधानमन्त्री विरुद्ध आन्दोलनय् कुहां वःगु विश्वय् थ्व न्हापांगु घटना जुइफु। उकथं हे थःगु हे पार्टीपाखें जुयाच्वंगु विरोधय् प्रधानमन्त्री केपी ओलीं नं तात्कालीन जुजु ज्ञानेन्द्र शाहं थें र्याली यायेगु ज्या नं न्ह्याकाच्वंगु दु। वर्तमान प्रधानमन्त्री ओलीं यानाच्वंगु पञ्च भेला शैलीया जुलुस शासनसत्ता थःगु ल्हातय् कायेधुंकाः तात्कालीन जुजु ज्ञानेन्द्रं यानाच्वंगु ¥याली स्वयां तसकं फिक्का जुयाच्वंगु दु। थुकिया मू कारण माला स्वयेगु खःसा आपालं जनता वर्तमान सरकारया ज्याप्रति सन्तुष्ट मजू धइगुया संकेत खः । दुईतिहाइ बहुमतया सरकारं स्वदँया दुने गुलि ज्या यायेमाःगु खः उलि ज्या याये मफुगु ला द हे दु, अःखबतं देय्यात भ्रष्टाचारया गालय् थुनेगु ज्या जुल । गुकिया लिच्वःकथं सरकारप्रति जनताया दुने असन्तोष ब्वलनाच्वंगु खः । जनता असन्तोष जूसां सरकार विरुद्ध तच्वयेक आन्दोलन धाःसा जुइ फयाच्वंगु मदु, थ्व सत्य खः । प्रधानमन्त्री केपी शर्मा ओलीं संसद भंग यानाः निर्वाचनया घोषणा यायेवं आन्दोलनया माहोल धाःसा ब्वलना वनाच्वंगु आःया अवस्था खः । राजनीतिक रुपं न्ह्यानाच्वंगु थ्व आन्दोलनया दिशा स्पष्ट दु। गबलय् तक प्रतिगमनया पलाः भिंकेगु ज्या जुइमखु अबलय् तक थ्व आन्दोलन न्ह्याना हे च्वनी । अथे खःसां प्रतिगमन विरुद्ध थीथी राजनीतिक पार्टीतय्सं न्हिथं आन्दोलनया ज्याझ्वः यानाच्वंगु दु। तर नेपाली कांग्रेस धाःसा प्रतिगमन विरुद्ध आन्दोलनय् वनेगु वा सरकारं घोषणा याःगु निर्वाचनया तयारी यायेगु धइगु बारे अलमल जुयाच्वंगु दु ।
नेपाली कांग्रेसया छथ्वः नेतात प्रतिगमनयात भिंकेगु ज्या मयासे आन्दोलनय् वनेगुया औचित्य मदु धयाच्वंगु दुसा छथ्वःसिनं आन्दोलन मखु निर्वाचनया तयारी यायेमाःगु खँ धायेगु यानाच्वंगु दु। नेपाली कांग्रेस दुने खने दयाच्वंगु थ्व दुविधां यानाः आन्दोलन घनिभूत रुपं न्ह्यायेत छगूकथं समस्या जुयाच्वंगु दु। मेखे थीथी राजनीतिक पार्टीतय्सं नं प्रतिगमन विरुद्ध मंकाः आन्दोलन यायेमाः धइगु खँय् बः बियाच्वंगु दु। नेपाली कांग्रेसं धाःसा मंकाः आन्दोलन यायेबलय् कांग्रेसया अस्तित्व तकं खतराय् लायेफु धासे निर्वाचनय् वन धाःसा कांग्रेसयात लबः दइगु विश्वास यानाच्वंगु दु। कांग्रेसया छपुचः नेतातय् विश्वास छु दु धाःसा नेपाल कम्युनिष्ट पार्टी (नेकपा) निकू कुचा जुयाच्वंगु आःया इलय् यदि निर्वाचन जुल धाःसा थःपिनिगु बहुमत वइगु सम्भावना दु। तर मेगु पुचलं प्रतिगमनयात भिंकेगु ज्या मयाः तले आः जुइगु आम निर्वाचनं नेपाली कांग्रेस जक मखु सुयात नं राजनीतिक रुपं लबः दइगु अवस्था मदु धकाः धायेगु यानाच्वंगु दु । कांग्रेसया थ्व निगू धारया कारणं गनं प्रतिगमनया लँपु झन जक बल्लाना वनीगु जकं मखुला धइगु न्ह्यसः ब्वलनाच्वंगु दु। थ्वहे झ्वलय् समाजवादी पार्टीया संघीय परिषद्या अध्यक्ष डा. बाबुराम भट्टराईं नं आः वयाः मंकाः आन्दोलन यायेमाःगु खँय् बः बिसें धायेगु यानाच्वंगु दुकि पञ्चायतया इलय् कांग्रेस-कम्युनिष्ट जानाः आन्दोलन यायेमाः धकाः धाःगु इलय् कांग्रेस माने मजूयाः ३० दँ तक पञ्चायतया शासन फयेमाःगु खः । यदि आः नं फुक्कं राजनीतिक पार्टी मिले जुयाः वर्तमान प्रतिगमन विरुद्ध आन्दोलन मयायेगु खःसा प्रतिगमनया ई नं उकथं हे ताःहाकः जुया वनेफु। तर डा. भट्टराईया उगु खँयात नेपाली कांग्रेसया नेतातय्सं धाःसा थुइके मफयाच्वंगु जकं खःला धइगु न्ह्यसः ब्वलनाच्वंगु दु ।
प्रतिगमन विरुद्ध थीथी राजनीतिक पार्टीतय्सं न्हिथं आन्दोलनया ज्याझ्वः यानाच्वंगु दु। तर नेपाली कांग्रेस धाःसा प्रतिगमन विरुद्ध आन्दोलनय् वनेगु वा सरकारं घोषणा याःगु निर्वाचनया तयारी यायेगु धइगु बारे अलमल जुयाच्वंगु दु ।
अथे ला नेपाली कांग्रेस वंगु आम निर्वाचन लिपा निगूगु दलकथं स्थापित जूगु खःसां संसदय् प्रमुख प्रतिपक्षया रुपय् म्हितेमाःगु भूमिका सशक्त रुपं म्हितेगु ज्या पार्टीपाखें जुयामच्वंगु अवस्था खः । अथे जुयाः आः सरकारं घोषणा याःगु निर्वाचन नं जु हे जुल धाःसां उगु निर्वाचनय् ब्वति कायेगु निंतिं कांग्रेसयात गुगु एजेन्डा माःगु खः, उगु एजेन्डा छु जुइ धइगु न्ह्यसः नं थन ब्वलनाच्वंगु दु। केपी शर्मा ओली प्रधानमन्त्री जुइधुंकाः संसदय् ल्ह्वनेगु निंतिं कांग्रेसयाके आपालं मुद्दात दुगु खः । तर कांग्रेसं उगु मुद्दायात ल्ह्वनेगु कुतः हे मयाः । आदिवासी जनजातिया अधिकार लिसें मुस्लिम, दलित, मिसा, अल्पसंख्यक व लिउने लानाच्वंपिं जनताया मुद्दायात ल्ह्वनेगु ज्या कांग्रेसं यायेमाःगु खः, तर मयाः । उकथं हे सरकारं यानाच्वंगु आपालं बेथिति, विसंगति, भ्रष्टाचारया विरुद्ध नं कांग्रेसं संसद जक मखु सतकय् नं गुगुंकथंया भूमिका म्हितूगु वा म्हिते फुगु अवस्था मदु। आःया अवस्थाय् कांग्रेस यदि निर्वाचनय् वन धाःसां नं मत फ्वनेगु एजेन्डा मदु। अज्याःगु अवस्थाय् पार्टीं आन्दोलन त्वःताः निर्वाचनय् वनेगु धइगु गनं कांग्रेसया पत्ता साफ जकं जुइगु मखुला धइगु न्ह्यसः ब्वलनाच्वंगु दु ।
आम जनताया मिखां स्वयेगु खःसा आम निर्वाचन लिपा कांग्रेसं म्हिताच्वंगु भूमिका तसकं गौण जुयाच्वंगु दु। थ्व खँयात इलय् हे वाः चायेकेगु खःसा आः जुइगु मंकाः आन्दोलनय् कांग्रेसं दुथ्यायेमाःगु आवश्यकता खः । यदि थ्व आन्दोलनयात घनीभूत रुपं न्ह्याकाः प्रतिगमनयात परास्त यायेफत धाःसा उकिया लबः कांग्रेसयात वनी । मखु नेकपाया विभाजनं निर्वाचनय् कांग्रेसयात बहुमत वइ धइगु म्हगस खनेगु खःसा थ्व म्हगस फगत म्हगस हे जक जुइगु अवस्था दु। आःया अवस्थाय् कांग्रेसया गतिविधियात स्वयेगु खःसा सत्ताया भागबन्डाय् लिकुनाः जनताया समस्यायात बेवास्ता यानाच्वंगु अवस्था खः । अले जनताया एजेन्डायात बेवास्ता यानाच्वंगु राजनीतिक पार्टीयात जनतां बहुमत बी धइगु कांग्रेसया अंकगणित नं गुलि तक समय सान्दर्भिक जुइ धइगु न्ह्यसः ब्वलनाच्वंगु दु। वर्तमान सरकारं घोषणा याःगु निर्वाचन जुइ वा मजुइ धइगु आशंका ब्वलनाच्वंगु दु। तर प्रतिगमन विरुद्धया जारी आन्दोलनं निश्चित रुपं थःगु उचाई कायम याइगु निश्चित दु। अथेजुयाः आः कांग्रेसं थ्व बिचाः यायेमाः कि थःगु तनेधुंकूगु साख कायम यायेगु खःसा आन्दोलनय् कुहां वयेगुया मेगु विकल्प मदु। प्रतिगमन लिसे सति वनेगु खःसा मेता हे खँ जुल ।
LEAVE YOUR COMMENTS