सांस्कृतिक चेतना ब्वलंकूगु नेपालभाषा शिक्षा
येँ महानगरपालिका दुनेया स्कुलय् स्थानीय भाय् कथं नेपालभाषा नं ब्वंकेगु अनिवार्य याये धुंकाः थुकिया प्रभाव शैक्षिक क्षेत्रय् जक सीमित मजुसे सांस्कृतिक, भाषिक, साहित्यिक ख्यलय् नं बुलुहुं खने दया वःगु दु । येँ महानगरपालिका २३ वडाया ग्वसालय् जूगु चिनाखँ व च्वखँ धेंधेंबल्लाखय् थुकिया बांलाःगु लिच्वः खने दुगु दु । वरिष्ठ बालसाहित्यकार शान्तदास मानन्धरया लुमंतिइ जूगु स्वक्वःगु चिनाखँ व च्वखँ धेंधेंबल्लाखय् यक्व हे मस्तय्सं नेपालभाषा चिनाखँ व च्वखँ कयाः ब्वति काल । उमिसं च्वये गु जक याःगु मखु, ज्याझ्वलय् न्ह्यइपुक ने वाः भासं ब्वनाः नं न्यंकल । अले उमिसं च्वःगु रचना नेवाः भासं जक च्वःगु मखु, स्वनिगःया संस्कृति, सम्पदाया बारे च्वःगु दु ।
मस्तय्सं थुकथं नेवाः भासं च्वयाहःगु शिक्षा ब्वनाहःगु धयागु नेवाः भाय् संरक्षणया निंतिं जक मखु थनया संस्कृति संस्कार संरक्षणया निंतिं तसकं महत्वपूर्ण खः । स्कुलस्तरय् हे नेवाः भासं ब्वंकेगु सुरु यायेवं भाय्या संरक्षणयात संस्थागत आधार बिउगु दु । छगू इलय् पञ्चायत सरकारं नालाकाःगु एक भाषा एक नीतिं यानाः बुलुहुं छेँय् छेँय् तकं न्ववायेगु त्वःताःहःगु नेपालभाषा आः विद्यालयया पाठयक्रमय् हे दुथ्याके वं औपचारिक रुपं शैक्षिक स्तरय् छ्यलाबुलाय् वःगु दु । थुकिं न्हूपुस् तायात भाषाप्रति जिम्मेवारी व गर्व बोध याकाबिउगु दु ।
बहुभाषिक समाजय् छगू जक भाषायात प्राथमिकता बीगु मखु, स्थानीय भाय्यात नं सम्मानजनक थाय् बीमाः । येँया स्कुलय् स्थानीय भाय् नेपालभाषा लागु यायेगु निर्णयं ताःई न्ह्यवनिसें उपेक्षित जुयाच्वंगु स्थानीय भाय्यात पुनःजीवन बीत ताःलाःगु दु । स्कुलय् स्थानीय भाय् लागु याःगु भाषिक अभ्यासया निंतिं जक मखु सांस्कृतिक पुनर्जागरणया निंतिं नं खः । थ्व अभ्यासं येँ महानगरयात थःगु थाय्या मौलिकता व पहिचान संरक्षण यायेत यक्व ग्वाहालि जूगु दु । नेवाः भासं स्थानीय संस् कृति बारे ब्वने खंगुलिं मस्तय्त संस्कृति प्रति चेतना बल्लाःगु दु, गुकिं भविष्यय् सम्पदा संरक्षण व थनया मौलिक संस्कृतियात निरन्तरता बीत यक्व हे ग्वाहालि याइ धयागु विश्वास याये फइ ।
LEAVE YOUR COMMENTS