भिंम्ह पासा, मभिंम्ह पासा

पासा सकसितं माः । सकसियां दइ । दिं सदां उथें जुइमखु । न्ह््यइपु–म्हाइपु जुयाच्वनी । सुख, दुःख, बेदनां थाय् कयाच्वनी । सुख जुइ । न्ह्यइपुसे च्वनी । न्ह्यइपुगु लकस बयान यायेत पासा माः । अथेहे दुःख जुइ । थुगु इलय् थःगु दुःख प्वंके मास्ते वइ, बेदना क्यनेगु इच्छा जुइ । थन नं भिंम्ह पासा ल्ययेमाः, गुम्हेसिनं दुःखया बेदनायात सुखय् हिलाबी । सुखया खँ न्यनाः सुखया अनुभव याका बी । तर मभिंम्ह पासां सुखयात दुःखय् हिलाबी ।

खय्त ला माःगु इलय् माः कथं ग्वाहालि कायेत पासा ल्यइगु खः । तर फुक्कं पासापिंसं माःबलय् माः कथं ग्वाहालि मयायेफु । पासाया संगत पासाया खँ न्यनाः मभिंगु ज्याखँ नं जूवनेफु । छम्ह पासां मेम्ह पासायात पदय् तयेत गुलि तक ज्या याः धइगु खँ चेतिय जातकय् नं कनातःगु दु । छगू इलय् चेतिय राष्ट्रया अपचर जुजुं राज्य यानाच्वन । व प्यंगुलिं ऋद्धि दुम्ह । आकासय् विचरण याना च्वनेफुम्ह । वयात देवतापिंसं नं रक्षा यानाच्वनी । वया म्हं चन्दन बास वः । वया म्हं उत्पल स्वां बास वः । वया पुरोहितया नां कपिल । पुरोहितया किजा कोरकलम्ब । व व राजकुमारलिसे छगू हे आचार्य कूलय् ब्वंम्ह । उकिं इपिं निम्हं मिले जूपिं पासा । वं थः जुजु जुलकि वयात पुरोहित यायेगु बचन नं बिउगु खः ।

पासाया उद्धार यायेगु । पासाया भिं तुनेगु । अझ पासाया उन्नति व प्रगति यायेगु इच्छा सकसिकें दइ । जुजुं नं उकथं हे इच्छा याःगु खः । थः पासाया भिं तुंगु खः । पासाया हित यायेगु स्वःगु खः । जुजुं थुकिया लागिं असत्यया लँपु लित । असत्य गबलें त्याइमखु । असत्यया संगतं थःगु अस्तित्व तकं तना वनी धइगु खँ थुगु जातकं क्यं ।

छन्हु व जुजु जुल । तर वं थः बौया पुरोहित कपिलयात पदं लिकाये मफुत । पुरोहितं थःगु कर्तब्य बांलाक पूवंकाच्वन । छन्हु पुरोहितं बिचाः यात समान आयु दुपिं नापं च्वंसा राज्य बांलाक न्ह्याइ । आः जि बुरा जुइ धुंकल । पुरोहित पद त्वते माल । जि प्रवजित जूवने । पुरोहितं थ्व खँ जुजुयात कन । वं जुजुयाके उजं काल । वं थःगु थासय् थः काय्यात पुरोहित पद बिल । थः ऋषि प्रबज्या कथं प्रबजित जुल ।

थ्व खनाः वया किजा कोरकलम्बया तं पिहां वल । वया मनय् द्वेष जाल । छन्हु जुजुं वयात न्यन, ‘छ पुरोहित पदय् मच्वनागु ला ?’ वं थः दाजु दुगुलिं पुरोहित पदय् मच्वनागु खँ न्ह्यथन । दाजु दयेकं थः च्वने मफुगु खँ नं कन । थ्व खँ न्यनाः जुजुं दाजुयात चीका वयात तयेगु बिचाः यात । तर थुकिया लागिं वयात दाजु स्वयां थकालि कथं क्यनेमाःगु जुल । जुजुं वयात थकालि अले दाजुयात क्वकालि प्रमाणित यायेमाःगु बचं बिल । जुजुं न्हय्न्हु लिपाया ई बिल ।

थ्व खँ नगर छगुलिं थ्यन । जुजुं मखुगु खँ ल्हाइगु जुल । थकालियात क्वकालि याइगु । क्वकालियात थाकालि । सकलें अजु चाल । उगु युग सत्य युग । गुकथं मखुगु खँ ल्हाइगु सुनां मसिउ । पुरोहित नं अजू चाल । वं थः बौयात धाःवन– तात, जुजुं मखुगु खँ ल्हानाः छपिंत चिकेगु ज्या याइगु जुल । झीगु पुरोहित पद ककायात बीगु जुल । तर प्रबजित जूम्ह बौम्ह निर्धक्क । वं सिउ मखुगु खँ ल्हानाः पदं लिकाये फइमखु । उकिं वं न्हय्न्हुया दिनय् थःयात नं धाः वा धाल ।

न्हय्न्हु दत । मखुगु खँ ल्हाइगु दिं । जुजुया लाय्कूया चुकय् म्वःम्वः मनूत । च्वनां च्वनेथाय् मदु । थ्व खँ पुरोहितं थः बौयात कंवन ।
जुजु बांलाक समाः याना पिहां वल । व जनताया दथुइ थ्यन । शक्तिशालीम्ह जुजु । आकासय् दनाच्वन । प्रबज्जित जूम्ह न्हापाया पुरोहित नं आकास मार्गं वल । व जुजुया न्ह्यःने फ्यतुल । वं जुजुयाके न्यन, ‘महाराज छु छःपिसं धात्थें मखुगु खँ ल्हानाः चिधिकम्हेसित तःधिकः यानाः पद बिइत्यनागु खःला ?’

जुजुं थुकियात सहर्ष स्वीकार यात । अनंलि वं जुजुयात धाल, ‘मखुगु खँ ल्हायेगु धयागु हानीकारक खः । थुकिं गुण स्यंका बी । प्यंगू नरकय् यंका बी । मखुगु खँ ल्हाइम्ह जुजुया धर्म नास जुइ । धर्म नास जुलकि थः स्वयम नष्ट जुइ । यदि छःपिसं मखुगु खँ ल्हाना बिज्यात धाःसा प्यंगुलिं ऋद्धि अन्त्य जुयावनी ।’ थ्व खँ न्यनाः जुजु भयभीत जुल । वं कोरकलम्बपाखे स्वल । वयात स्वयेवं भय वं थें जुल । जुजुं हानं धाल, ‘भन्ते छःपिं चिधिकम्ह खः । कोरकम्बस तःधिकःम्ह खः ।’ जुजुया थ्व खँ न्यनेवं प्यम्ह देवपुत्रपिं लिचिला वन । थज्याःम्ह मखुगु खँ ल्हाइम्हेसित पाः च्वनेमखु धाधां इपिं अन्तरध्यान जुल । उघ्रिमय् जुजुया म्हुतु नं नँ वल । व स्वर्गं कुतु वल । बँय् लात । वया प्यंगुलिं ऋद्धि तनावन ।

थ्व खनाः तपश्वीं धाल, ‘महाराज ग्याना बिज्याये मते । छःपिसं सत्य खँ ल्हाना बिज्याहुँ । छपिनि शक्ति न्हापा थें जुइ ।’ तर जुजुं तपश्वीया खँ मन्यं । जुजुं न्हापा थें मखुगु खँ ल्हात । थुगु इलय् वयागु तुतिया ग्वालि तक जमिनय् दुहां वन । थ्व खनाः तपश्वीं हानं सचेत यात । जुजुं असत्य खँ ल्हायेगु मत्वःतू । थुगु इलय् पुलि तक जमीनय् दुहां वन । थुगु इलय् तकं जुजुं तपश्वीया खँ पत्या मयाः । वं धाल, ‘भन्ते छपिं चिधिकःम्ह हे खः । कोरकलम्बस तःधिकम्ह हे खः ।’ थथे धायेवं वया खम्पातक जमीनय् दुहां वन ।

तपश्वीं वयात हानं सचेत यात, ‘हे राजन, यदि सत्य खँ ल्हात धाःसा न्हापा थें जुइ । मखुगु खँ ल्हात धाःसा छःपिं झन् हे दुसुना वनी ।’ जुजुं वयागु खँय् विश्वास मयाः । न्याक्वःगु इलय् नं वं मखुगु खँ ल्हात । थथे धायेवं त्यपुचा तक दुहां वन । खुक्वःगु इलय् मखुगु खँ ल्हायेवं छाति तक दुसुना वन । थःगु थज्याःगु गति जुलं नं वं सत्य बचन मल्हात । थनं लिपा व जमीनय् दुसुना वन । व नरकय् पतन जूवन ।
चेतीय जुजुया अतिकं मिले जूम्ह पासा कोरकलम्बक । वयात पुरोहित यायेगु जुजुया तःधंगु इच्छा । थुकिया लागिं वं असत्य खँ ल्हात । थुकिं यानाः वया तुति जक मखु । म्ह तकं जमीनय् दुसुना वने माल ।

पासाया उद्धार यायेगु । पासाया भिं तुनेगु । अझ पासाया उन्नति व प्रगति यायेगु इच्छा सकसिकें दइ । जुजुं नं उकथं हे इच्छा याःगु खः । थः पासाया भिं तुंगु खः । पासाया हित यायेगु स्वःगु खः । जुजुं थुकिया लागिं असत्यया लँपु लित । असत्य गबलें त्याइमखु । असत्यया संगतं थःगु अस्तित्व तकं तना वनी धइगु खँ थुगु जातकं क्यं ।

थन तपश्वीं असत्य खँ ल्हातकि गुलि तक दुःख सी धइगु खँ नं क्यनातःगु दु । गुगु थुकथं दु । मखुगु खँ ल्हायेगु धइगु गुण स्यनीगु तःधंगु हानीकारक खः । थुकिं प्यंगू नरकय् यंकाबी । मखुगु खँ ल्हाइम्ह जुजुया धर्म नाश जुइ । धर्म नाश जुल कि थः स्वयम नाश जुइ ।

सम्बन्धित बुखँ

LEAVE YOUR COMMENTS