लिज्ञां बियाच्वंगु ‘तुयुगु अजः’
थुगुसी स्वक्वःगु नेपालभाषा साहित्य नखःया झ्वलय् ‘सन्ध्या टाइम्स पिथना प्रा.लि. पिकाकः जुयाः पिदंगु जासुसी उपन्याससम्राट भाजु राज साय्मिया झिगूगु कृति ‘तुयुगु अजः’ उपन्यास ब्वनेगु ह्वःताः चूलाःगुलिं जिं थःत भाग्यमानी थें तायेकाः लसतां भय्भय् बीका च्वना । दकलय् न्हापां भाजु राज साय्मियात भिंतुनालिसें दुनुगलंनिसें सुभाय् देछानाच्वना ।
खतुं वय्कःया ‘योम्ह शत्रु’, ‘पर्दाभित्रको रहस्य’ व ‘मृत्यु महल’ थ्व स्वंगू सपूm बाहेकं ‘मखुगु सत्य’निसें कयाः आतक पिदंगु सपूmत ब्वना वयाच्वनागु दु । गुलि नं सपूmत ब्वना व तसकं हे बांलानाः च्वछायेबह नं जू । भाषा नं सरल जुयाः मथू धइगु नं गनं हे मदु । धायेगु हे खत धाःसा थ्व वय्कःया विशेषता हे धायेमाः ।
जि थः हे नं अप्वःथें जासुसपाखे मन धे चू वंम्ह जूगुलिं वय्कःया थज्याःगु सफुलिं ‘अगःचा मालां देगः लू’ धइथें जुया बिउगु दु । छाय्धाःसां जासुस उपन्यास सनसनीपूर्ण जुयाः उकी वर्णन यानातइगु लु, जूगु घटना, अनया लकस आदि व अपराधी सु खः ? गथे यानाः ज्वनीगु जुइ ? अले छु जुइ ? धइगु सीकेत थ्व मन हथाय् चाया च्वनीगु ।
गुकिं यानाः उपन्यास पूवंक ब्वने क्वमचाःतले च्वनाच्वंगु थासं दने वने हे मास्ति मवयेका बी । खय्तला न्हापा न्हापा खय् भाय्या निगू प्यंगू जासुसी उपन्यास मब्वनागु नं मखु । तर उकिया च्वमि धाःसा वय्कः भाजु राज साय्मि मखु । तःदँ हे लिपा धइथें वय्कः राज साय्मिं जासुसी उपन्यास च्वयादी धइगु खँ बय्बय् जुल ।
अनंनिसें हे वय्कःया उपन्यास ब्वने याना हया । तसकं बांलानाः यया नं वल । ब्वँब्वं हे मगाः थें नं जुया वइ । खय् भाय्या जक जासुसी उपन्यास ब्वना वयाच्वनाम्हेसित जिगु थःगु हे मांभाय् नेपालभाषां नं जासुसी उपन्यास ब्वने हनाः ‘अहो …. हो ….हो’ धइथें जि थुलि लय्ताल कि धयां ब्याःगु हे मखु ।
झीगु नेपालभाषा साहित्यया ख्यलय् साहित्यया थीथी विधात यक्वं दु, तर जासुसी उपन्यासया विधा मदयाच्वंगु इलय् भाजु राज साय्मिं जासुसी उपन्यासया विधायात नं दुथ्याकाः तय्जु याः वःगु खनाः जिगु नुगलय् लसताया स्वां चकंक ह्वयाबिल । थुकिं लुँइ नस्वाः हे ह्वले थें जुयाबिल ।
जिं वय्कःयात नाप लाक्वपतिकं धायेगु यानाच्वना कि ‘छिं दिपाः मकासे जासुसी उपन्यास हे जक च्वयादिसँ, छिगु भाषा शैली नं बांलाः’ धकाः । आः नं थ्व च्वसुपाखें हे वय्कःयात इनाप याना हयाच्वना कि ‘जासुसी उपन्यासयात दकलय् न्हापां थाय् बियाः च्वयादिसँ ।’ अथे धकाः मेमेगु विधाय् च्वयादीमते धकाः धायेत्यनागु मखु ।
च्वयादिसँ, मेमेगु विधाय् दुहां वनाः नं, तर जासुसीया लुखायात तिनाः मखु । अले मेता छता खँ सामाजिकय् फयांफछि जासुसी ल्वाकछ्यानादीमते । थुगु ‘तुयुगु अजः’ उपन्यास ब्वँब्वं वनेबलय् छम्ह मिसाया निंतिं आपराधिक घटना जू वंगु सी दु । अले मतिइ हे मदुकथंयाम्ह अपराधी जू वनाच्वंगु दु ।
उपन्यास ब्वँब्वं वनेबलय् च्यागूगु द्यानिसें सनसनीपूर्ण जुया वनाच्वंगु दु । थुगु उपन्यासं झीत छु लिज्ञां बियातःगु दु धाःसा ध्यबाया मामिलाय् छुं नं दसि प्रमाण मदयेक छुं नं ज् या याये मजिउ धइगु खँ सन्देश बियातःगु दु । थःत ज्या मिले याना बिउम्ह पासा प्रशान्तं धायेवं छुं हे दसि प्रमाण मदयेक झिगू झिगू लाख मछिं ध्यबा ग्वाहालि बिउगुयात झीसं लुमंका तयेमाः ।
थःत ग्वाहालि याःम्ह मनू धायेवं तुं थथे याये मजिउ धयागु मू खँ थुकिं सी दयाच्वंगु दु । जितः ताःकथं छुं कथंया नं उपन्यास ब्वनेबलय् खालि ब्वनाः न्ह्यइपुक ई जक छ्यायेगु मखसे छु उपन्यासं गज्याःगु लिज्ञां, शिक्षा, सन्देश बियातःगु दु वा बियाच्वंगु दु धइगु बारे नं क्ववाले फयेकेमाः । अले उगु लिज्ञां शिक्षाकथं थःपिनिगु जीवनय् नं छ्यला वने फयेकेमाः । सयेकेमाः ।
उपन्यास बांलाः । न्ह्यःने सामाजिक थें च्वंसां लिपा मनय् दुने गय् थें, छु थें जुइक सनसनीपूर्ण जू वनाच्वंगु दु । उपन्यास याकनं हे क्वचाइगु खःला धकाः ग्या ग्यां ब्वने च्वनेमाः । आखिरय् ताःहाक जूसां, चिहाकः जूसां क्वचायेकेला मा हे माः । बरु उपन्यास क्वचायेके न्ह्यः सुमन व श्रद्धाया रोमान्टिक लु भचा तनाः क्वचायेकूगु खःसा अझ बांलाइगु थें जितः ताः ।
अन्तय् वय्कःयात लिसा कयाः भिंतुना देछानाच्वना । हाकनं हाकनं जासुसी उपन्यास च्वयादी, अले जिपिं थेंज्याःपिं जासुसी उपन्यासय् मन क्वसाःपिंसं ब्वने खनी धकाः आस्कुति जुयाच्वना । सुभाय्
# पुष्परत्न ताम्राकार ‘स्वीटहर्ट’
LEAVE YOUR COMMENTS