प्रमया अभिव्यक्तिं ब्वलंकूगु न्ह्यसः

प्रधानमन्त्री केपी शर्मा ओलीं संसद विघटन याःगु विरुद्ध नागरिक समाजं नं आन्दोलनया ज्याझ्वः शुरु याःगु दु। नागरिक समाजया आन्दोलनयात वर्तमान सरकारं दमनया नीति ज्वंगु दु। नागरिक समाजं बालुवाटारय् प्रदर्शन यायेवं लःया फोहरां छ्वाकेगुलिसें लाठी चार्ज यानाः सरकारं थःगु दमनकारी नीति ज्वंगु स्पष्ट जूगु दु। नेपाःया राजनीतिक इतिहासयात स्वयेगु खःसा व्यवस्था परिवर्तनया निंतिं गुलि नं आन्दोलन जुल उकी सरकारी पक्षं दमन यायेगु नीतियात हे निरन्तरता बिउगु खनेदु। आः वयाः केपी शर्मा ओली नं अज्याःगु हे लँपुइ वनाच्वंगु आभास आम जनतां यानाच्वंगु दु ।

वर्तमान सरकारं शान्तिपूर्ण जुलुसयात गुगु दमन यायेगु नीति काःगु दु, थज्याःगु दमन वंगु २०६२ सालया आन्दोलनया इलय् नं मजिउ धासें नागरिक समाजं उकियात कयाः निन्दा याःगु खः । आःया सरकार संघीय लोकतान्त्रिक देय्या सरकार खः । तर सरकारया रवैया स्वयेगु खःसा पंचायतकालीन सरकार स्वयां छुं पानाच्वंगु मदु। पंचायतया इलय् जक प्रजातान्त्रिक आन्दोलनया समर्थन याःपिंत जक थीथीकथं दमन यायेगु याइगु खः । तर थौं लोकतन्त्रया इलय् जूगु दमनयात स्वयेगु खःसा वर्तमान सरकार अधिनाकयवादपाखे न्ह्याः वनाच्वंगु स्पष्ट सीदु। थम्हं याःगु गैरसंवैधानिक ज्याया विरोधय् कुहां वःपिं नागरिक समाजयात थुकथं दमन यायेगु धइगु सार्वभौम जनताया सः क्वत्यलेगु ल्याखं याःगु निर्मम प्रहार जक मखु थ्व लोकतन्त्रया विरुद्ध हे याःगु प्रहार खः ।

प्रम ओली थम्हं छिउगु असंवैधानिक पलाःयात वैधानिकता बीगु निंतिं थीथीकथंया हठकन्डा नालाच्वंगु दु। दकलय् न्हापां ला प्रम ओलीं सर्वोच्च अदालतयात प्रभावित यायेकथंया अभिव्यक्ति बिउगु धासें नागरिक समाजं याःगु प्रदर्शनयात दमन यायेगु व नागरिक समाजया न्ह्यलुवापिंत लाथेपाथे दायेगु ज्या यात । थ्व तसकं निन्दनीय ज्या खः । अज्याःगु निन्दनीय ज्या यायेत प्रहरीयात हौसला सुनां नं बिउगु दुसा व तप्यंक प्रम ओलीं हे बिउगु खः । वयागु हे निर्देशनकथं याःगु दमन खः । शान्तिपूर्ण प्रदर्शनय् कुहां वःपिंत प्रहरीं नियतवश थुकथं दमन याइ मखु। आतक शान्तिपूर्ण आन्दोलनय् थुकथं दमन जूगु धइगु पंचायतकालय् जक खः । तर थौं लोकतान्त्रिककालय् वयाः नं जूगु अज्याःगु दमनयात आम सर्वसाधारणं स्वीकार यायेफइगु अवस्था मदु ।

संविधानं बियातःगु अधिकारयात छ्यलाः याइगु आन्दोलनयात दमन यायेगुलिइ सरकार थुकथं न्ह्यचिउगु मू कारण प्रम ओलीयाके ब्वलंगु सर्वसत्तावाद हे खः । प्रम ओली वर्तमान संसद भंग यायेगु जक मखु, संविधानया हे हत्या यायेकथं न्ह्यचिलाच्वंगु दु। थ्व ल्याखं स्वयेगु खःसा प्रधानमन्त्री ओलीं नेपाःया संविधानयात हे ध्वस्त याइगु सम्भावना नं अप्वयाच्वंगु दु। संविधानतः उकिया पालना यायेमाःगु दायित्व सरकार प्रमुखया खः । तर प्रम ओलीया व्यवहार स्वयेगु खत धाःसा संविधान पालना यायेगु मखु उकियात गुकथं ध्वस्त यायेफइ धकाः स्वयाच्वंगु स्पष्ट जुजुं वनाच्वंगु दु ।

मेता खँ पार्टी विभाजन लिपा प्रधानमन्त्री ओलीं गुगुकथंया अभिव्यक्ति बियाच्वंगु दु, थुकिं गनं देय्यात हाकनं द्वन्द्वया अवस्थाय् जकं यंकीगु मखुला धइगु न्ह्यसः नं ब्वलनाच्वंगु दु। राजनीतिक रुपं देय्या प्रधानमन्त्रीं सन्तुलित बिचाः तयेमाःगु खः । तर प्रम ओलीयाके ब्वलनाच्वंगु अहंकारं यानाः अज्याःगु सन्तुलित बिचाः तयेगु ला गन खः गन अःखबतं थः विपक्षीयात लाथेपाथे धायेगु जक मखु इमिगु विरुद्ध थः कार्यकर्तायात उत्तेजित यायेगु ज्या यानाच्वंगु दु। गुकिया लिच्वः अन्ततः देय् द्वन्द्वया चक्रब्युहय् लाइगु सम्भावना दु। यदि देय् हाकनं छकः द्वन्द्वया चक्रब्युहय् लातधाःसा थुकिं देय्यात गन थ्यंकी धइगु न्ह्यसः ब्वलनाच्वंगु दु ।

प्रधानमन्त्रीं बीगु अभिव्यक्तिइ खने दुगु वय्कःया अहमतां देय्या अवस्था गुखेपाखे न्ह्याइ धइगु क्यनाच्वंगु दु। वय्कलं सर्वोच्च अदालतय् विचाराधीन मुद्दाय् बहस यानादीम्ह विद्वान अधिवक्तायात क्वह्यंकेगु। पत्रकार, बुद्धिजीवीपिंत नं क्वह्यंकेगु ज्या यानाच्वंगु दु। थ्व धइगु देय् या छम्ह प्रमं यायेगु ज्या मखु। तर प्रम ओलीं थः राज्यया प्रमुख खः धइगु तकं ल्वःमंकाः थज्याःगु अभिव्यक्ति बियाच्वंगु दु गुकिं यानाः वय्कःप्रति हे न्ह्यसः ब्वलनाच्वंगु दु ।

प्रम ओली वर्तमान संसद भंग यायेगु जक मखु, संविधानया हे हत्या यायेकथं न्ह्यचिलाच्वंगु दु। थ्व ल्याखं स्वयेगु खःसा प्रधानमन्त्री ओलीं नेपाःया संविधानयात हे ध्वस्त याइगु सम्भावना नं अप्वयाच्वंगु दु। संविधानतः उकिया पालना यायेमाःगु दायित्व सरकार प्रमुखया खः ।

मेता खँ प्रधानमन्त्रीं न्ववाइगु ज्याझ्वलय् लापा थाइपिं कार्यकर्तायात कयाः नं आः न्ह्यसः चिं दनावःगु दु। प्रधानमन्त्रीं छुं धायेवं न्हिलाः लापा थाइपिं थज्याःपिं कार्यकर्ताया कारणं हे प्रम ओली उत्साहित जुयाच्वंगु खः । तर लापा थानाच्वंपिंसं थ्व खँ ल्वःमंकूगु दु कि प्रमया अज्याःगु अभिव्यक्तिं देय् विकासपाखे मखु विनासपाखे वनाच्वंगु दु। प्रम ओलीं न्हापा नेपालं थःगु हे झन्डा ब्वयेकाः पानी जहाज चले याये धाःबलय् नं थुकथं हे लापा थाःगु खः । अथेहे छेँय् छेँय् पाइप लाइनपाखे ग्यास वितरण याये धकाः धाःबलय् नं थुकथं हे तालि थाःगु खःसा प्रधानमन्त्रीं राष्ट्रवादया नारा बिउबलय् नं थुकथं लापा थाःगु खः । तर थौं प्रधानमन्त्री ओलीया राष्ट्रवादया नारा गन तनाच्वन धकाः बिचाः यायेमाःगु आवश्यकता जुयाच्वंगु दु। खः छगू इलय् भारतया तच्वंक विरोध याःम्ह राष्ट्रवादी प्रधानमन्त्री ओली आः वयाः व हे भारतया चरमभक्त खने दयाच्वंगु दु ।

राजनीतिइ सिद्धान्तं गाइड यायेमाःगु खः । तर थौंया राजनीतिइ सिद्धान्तं मखु हास्यव्यंग्यं गाइड यानाच्वंगु दु। उकिया हे लिच्वः खः देय् विकास जुइगु पलेसा विनासपाखे न्ह्याःवनाच्वंगु। भ्रष्टाचार संस्थागत जुया वनाच्वंगु। तर सरकारं थम्हं यानागु ज्याया प्रचार संचारमाध्यमं मयाः धकाः तं प्वंकेगु ज्या यानाच्वंगु दु। बांलाःगु ज्यायात निश्चित रुपं सकसिनं तारिफ याइ, तर ज्या हे मयासें थः आसेपासेपिंत जक पोसे यायेकथं यानाच्वंगु ज्याया विरोध जुइगु स्वाभाविक खः । उकियात हे प्रधानमन्त्री थः विरोधी तायेकेगु मानसिकतां ग्रस्त जुयाच्वंगु दु। प्रधानमन्त्रीं याःगु आपालं ज्या नेपाःया कानून अःखः जूगुलिं हे संचार माध्यमं उकियात कयाः विरोध याना वयाच्वंगु खः । अथेजुयाः प्रधानमन्त्री ओली आम संचारमाध्यमप्रति असहिष्णुता प्वंकेगु याना वयाच्वंगु खः । लिच्वःकथं प्रधानमन्त्री झन जक बदनामीया गालय् कुहां वनेगु स्वयां मेता छुं जुयाच्वंगु मदु ।

सम्बन्धित बुखँ

LEAVE YOUR COMMENTS